“Airbus A350-1000ULR” sərnişin təyyarəsi Avstraliyadan Fransaya 24 saat 24 dəqiqə fasiləsiz uçaraq Ginnesin Rekordlar Kitabına düşüb.

NOCOMMENT.az xəbər verir ki, şirkətin sınaq uçuşu çərçivəsində Melburn və Tuluza şəhərləri arasında 23 min 155 kilometr məsafə qət edilib.

Bu, kommersiya avialaynerləri arasında məsafəyə görə ən uzun uçuş rekordu olub.

Uçuş müntəzəm reys deyil, “Qantas” şirkətinin “Project Sunrise” layihəsi üçün sınaq xarakteri daşıyıb. Göyərtədə pilotlar və mühəndislərdən ibarət 13 nəfər yer alıb. Ekipaj səyahət zamanı iki dəfə günəşin batmasını və doğmasını izləyib.

3,6 milyon insanın canlı izlədiyi bu uçuş “Flightradar24” platformasında Kraliça II Elizabetin son reysindən sonra ən çox baxılan ikinci marşrut olub.

Qeyd edək ki, “Qantas” Sidney şəhərindən London və Nyu-Yorka birbaşa reyslər açmaq üçün bu modeldən 12 ədəd sifariş edib. İlk uçuşların 2027-ci ildə başlaması nəzərdə tutulur.