Uydurulmuş alın yazısı

 

“Alın yazısı”, “qədər”, “qismət” və sairə bu tipli sözləri günaşırı da olsa qulaqlarınız eşitməyə məcburdu. Çünki elə bir cəmiyyətdə yaşayırıq ki, insanların böyük hissəsi həyatlarında baş verən hadisələri, dəyişiklikləri o sözlərə bağlayıb allahın ayağından asırlar. Yəni, toplumun düşüncəsinə görə tanrı əzəldən əbədəcən olacaq hər şeyi əvvəlcədən bilir və təqdir edir. Bu fikirlərin formalaşması birbaşa islam dinindən irəli gəlir. Dinə görə, allah başlanğıcdan sona qədər baş verəcək bütün hadisələri tam şəkildə bilir. Dindarların dediklərinə inansaq onda belə çıxır ki, allah keçmişi, bu günü və gələcəyi eyni anda görür. İnsanın nə zaman doğulacağı, nə vaxt öləcəyi, nələr edəcəyi də daxil olmaqla hər şeyi öncədən bilir. İnsanların həyatının bütün təfərrüatları, etdikləri günah və mükafatları, yaxşı və pis əməlləri, cənnətdə və ya cəhənnəmdə olacağı allaha əvvəldən məlumdur. İslam dininə görə hətta insanların başına gələn bəlalar da allahın icazəsi ilə olur. Müqəddəs hesab edilən “Quran”dakı nümunələrə baxaq. Təğabün surəsi 11 ci ayədə yazılır: “Allahın izni olmadıqca (heç kəsə) heç bir müsibət üz verməz. Kim Allaha iman gətirsə, (Allah) onun qəlbini haqqa doğru yönəldər. (O, dünyada baş verən hər şeyin Allahın əzəli hökmü və izni ilə olduğunu bilər). Allah hər şeyi (keçmişi, indini və gələcəyi) biləndir!” Bunun ardınca Hədid surəsi  22-ni oxuyaq: “Yer üzündə baş verən və sizin öz başınıza gələn elə bir müsibət (bəla, qəza) yoxdur ki, Biz onu yaratmamışdan əvvəl o, bir kitabda yazılmamış olsun. Bu, Allah üçün çox asandır!”

Buradan aydın olur ki...daha dəqiq desək, yuxarıdakı ayələr onu diqtə edir ki, 5 yaşında zorlanan uşaqları allah zorladır. Çünki tanrı o uşağın qədərini əvvəlcədən belə yazıb. Konkret Hədid ayəsi 22-yə görə başınıza gələn pis işşlərin, müsibətlərin, bəlaların, qəzaların, zorlanma hadisələrinin ssenarilərini allah yazır. O zaman belə çıxır ki, birinci Qarabağ döyüşlərində ermənilər tərəfindən əsir alınaraq zorlanan azərbaycanlı qadınların, Xocalı faciəsində valideynlərinin gözləri önündə uşaqlarının vəhşicəsinə qətlə yetirilməsinə, Afrikada acından ölən minlərlə insanların belə həyat yaşamalarına icazəni allah verir.

Dindarlar bu mövzuya cavab arqumenti olaraq deyirlər ki, allah insana azad iradə verib. Onların təbirincə desək, lap elədir. İnsana azad iradə verilib. Amma yenə də ziddiyyət yaranır. Çünki allah bilmir ki, mən doğulandan sonra azad iradəmlə gələcəkdə ya manyak olub uşaq zorlayacam, ya da yaxşı adam olacam? Ayələrə nəzər salanda bunu bildiyini görə bilərik. Və buna görə yenə də bunu bilə-bilə yaradırsa deməli allah sadistir. Cəhənnəmdə yanacağımı bilə-bilə məni yaradıb və 5 yaşında uşağı zorlayacağımı bilsə də bu olayın yaşanmasına şərait yaradır. Ümumiyyətlə, hansı valideyin razı olar ki, 5 yaşlı uşağı zorlansın? Amma allah razı olur! Dindarlar onu da vurğulayırlar ki, uşaq o yaşda zorlanıb ölsə belə sorğusuz-sualsız cənnətə gedəcək. Belə çıxır ki,  5 yaşlı uşaq cənnətə gedəcək deyə, əzablar içində zorlanıb ölməlidi. Budurmu allahın yazısı? Bəs, allah ədalətli və mərhəmətli idi? 5 yaşlı dünyadan bixəbər  və günahsız uşağın zorlanma ssenarisini yazan necə ədalətli ola bilər? Buradan bir nəticə çıxır ki, digər dinlər kimi quran kitabı da insanın beyin məhsuludu. Və özü də normal beynin məhsulu deyil. Heç bir düşüncəli baş bu cür axmaq, qəddar və sadistcə kitab yazmaz. Sevgi və nəsihət, mərhəmət və ədalət dolu bir kitab yazar.

İlahiyyatçı və təfsirçilər islam dininə əsasən belə iddia irəli sürürlər ki,  insanın qismən də olsa iradəsi var. İnsan bu iradə sayəsində yaxşılıqla pisliyi ayırd edə, doğru yolu tapa bilər və hidayət əldə edərək cənnətə gedə bilər. Ancaq məlum olduğu kimi “Quran” ayələri ilahiyatçıların bu arqumentlərinin əksini söyləyir; Allah yaradacaqlarının aqibətini, yəni bütün canlıları yaratmamışdan əvvəl talelərini təyin etmişdir. Başqa sözlə desək, kimin cənnətdə, kimin cəhənnəmdə olduğu əvvəldən tanrıya bəllidir. Məsələn, tanrı hələ doğulmamış bir adamın öləndən sonra cəhənnəmə gedəcəyi və hər gün sonsuza qədər yandırılaraq işgəncələrə məruz qalacağını bilir. Eyni zamanda müsəlman olub cənnətdə huri ilə yaşayacağını da müəyyən edib. Gəlin məsəlinin daha dərininə varıb addım-addım düşünək: Allah hər şeyi əbədiyyətdən bilirmi? Bilir. Doğulmazdan əvvəl həyatımla bağlı hər detalı bilirmi? Bilir. Deməli, yaşayarkən allahın həyatımla bağlı yazdığı “alın yazı”mın hər hansı bir detalını dəyişdirmək şansım varmı? Yoxdur! Niyə? Ona görə ki, Ənam sürəsi 125-də deyir: “Allah kimi düz yola yönəltmək istəsə, onun köksünü islam (dini) üçün açıb genişləndirər, kimi azdırmaq istəsə, onun ürəyini daraldıb sıxıntıya salar. O, sanki (sıxıntının şiddətindən) göyə çıxar. Allah iman gətirməyənlərə pisliyi belə edər!”  Allahın öz yazdıqlarını təkzib etmək üçün mənim iradə göstərməməyim mümkündürmü?! Xeyr! Çünki, yazıb ki, allah kimi doğru yola yönəltmək istəsə onu edir. Onda mən azad iradəmlə nə isə etsəm belə allah istəmirsə azad iradəmi boşuna işlədirəm; Hansı azad iradədən danışırıq?

Azad iradə iddası yalandır, aldatmadır. Çünki gördüyünüz kimi ayədə deyilir ki, allah istədiyini doğru yola yönəldir. Belə çıxır ki, dindarı da dindar edən, ateisti də ateist edən odur:))) Təsəvvür edin birini ateist edib sonra onu lənətləyib cəhənnəmdə yandırır:)) Allahın insanların taleyini əbədiyyətə qədər təyin etmədiyini, insanların həyatının təfərrüatlarını və hərəkətlərini bilmədiyini və insanın öz iradəsi ilə öz taleyini yaşadıqlarını söylədikdə, allah avtomatik gələcəyi bilməyən bir varlıq olur. Allah bəzi insanların dualarını qəbul edərək taleyini dəyişə bilərmi? Məsələn, qəlbi möhürlənmiş günahkar və cəhənnəmlik bir insanın duasını qəbul edib onu cəhənnəmdən xilas edə bilərmi? Bu suala "bəli" cavabını versəniz; Allahın hər şeyi öncədən bilmədiyini, gələcəkdə yazılan taleyi bir duaya görə dəyişdirəcəyini bilmədiyini söyləmiş olursunuz. Suala "xeyr" cavabını versəniz; Bu allahın cənnət və cəhənnəm əhlini əvvəldən təyin etdiyi mənasına gəlir. Yəni, tanrı insanların bir qismini sonsuza qədər yandırmaqla, digər qismini isə hurilərin arasında cənnətdə xoşbəxt yaşatmaqla oyun qurmuş olur ki, bu sadəcə sadislik və ədalətsizlikdir. Belə qəddar bir tanrı varlığına inanmaq isə ağlasığmazdır.