Möcüzə ovçuları

Müsəlmanlar dinin təbliğatını apararkən "Quran möcüzələri" sözünü daha çox dilə gətirirlər və təkidlə qeyd edirlər ki, bütün elmlər və kəşflər “Quran” kitabında öz əksini tapıb. Onların dediyinə görə 1400 il əvvəl allah Məhəmmədə hər şey barədə məlumat verib. Meyvə-tərəvəz (bəzən səmada, heyvanlarda, ağaclarda və sairə) üzərində (bəzən də içərisində) əyri-üyrü cizgilər görüb möcüzə hesab edən beyinsizlər özlərini xoşbəxt hesab edirlər. İddialarını bəzəyib-düzəyib youtube - də, sosial şəbəkələrdə “qurandakı elm” adı altında insanlara sırımaqla məşğuldurlar. Təbii ki, “Quran”ı oxumayan və elmdən anlayışı olmayan kütlə dindarların bu tipli manevrlərini həqiqət sanır. Çünki əhalimizin əksər hissəsi eşitdiyinə inanan xarakterdədir. Nəyi isə araşdırmaq, oxumaq əvəzinə asan olanı seçirlər, yəni eşitdiklərinə və gördükləri fotoya inanırlar.

Ən çox möcüzə kimi cəmiyyətə təqdim edilən ayələrdən biri “zəriyat surəsi” 47-dir. Sözügedən ayədə yazılır: “Biz göyü qüdrətimizlə yaratdıq və onu genişləndiririk.” Bəzi təfsirçilər “biz onu genişləndiririk” ifadəsini planetimizdə yaşayan sakinlərin ruzisinin çoxaldılması, getdikcə artırılması kimi izah etsələr də, bəzi müasir təfsirçilər, din adından danışanlar isə həmin ifadəni qalaktikaların getdikcə bir-birindən uzaqlaşmasına işarə etdiyini bildirmişlər. Qeyd edək ki, ilk dəfə 20-ci əsrin əvvəllərində astronom Edvin Habl və Milton Humason qalaktikaların “Süd yolu”ndan, yəni bizim qalaktikamızdan uzaqlaşdığını kəşf etdilər. Başqa sözlə desək, bütün qalaktikalar bir-birindən uzaqlaşır, genişlənir. Bu sübut ediləndən illər sonra islamçılar kainatın genişlənməsini Quran kitabı ilə əlaqələndirib möcüzə yaratmağa çalışdılar.

      Yeri gəlmişkən vurğulayaq ki, ilahiyyat professoru türkiyəli Abdulaziz Bayandur bu barədə danışarkən qeyd edib ki, əslində “genişləndiririk” sözü kainata dəlalət etmir. Professor “Quran”dan həmin ayəni ərəbcə oxuyaraq tərcüməsini  belə verib: “Göyü biz qüdrətimizlə qurduq və buna gücümüz yetər də”.

Lap tutaq ki, “zəriyat” surəsi 47-ci ayədəki “genişləndiririk” sözü qalaktikalara işarə etsə də, bu onun möcüzəsinə və allahın kitabı olduğuna sübut deyil. Ona görə ki, “Quran”dan öncə yazılmış başqa din kitabında da “genişlənmək” sözləri var. Məsələn, “kainatın genişlənməsinin” əsas mənbəyi ən qədim hind dini olan “Brahmanizm”ə dayanır. “Brahma” kitabında belə bir mətn var: “Sonra yaradılışa plazma ilə başladı. Tüstü yaratdı. Bu tüstudan bütün kainat yarandı. Sonra kainat Brahmanın iradəsi ilə genişlənməyə başladı və gələcəkdə də eyni şəkildə davam edəcək”. Gördüyünüz kimi məsələni tək tərəfli araşdıran insanları, digər kitablardan məlumatı olmayan adamları din alverçiləri “quran möcüzələri”- adı altında asanlıqla aldada bilirlər. Mövzumuza başqa tərəfdən də baxa bilərik. Özünüzə sual verin və düşünün: Niyə kainatın genişlənməsi elm tərəfindən sübut olunana qədər dindarlar çıxış edib demirdilər ki: “baxın, Quranda belə bir ayə var. Kainat genişlənir. Bunu elmi olaraq yoxlayın”… falan. Amma elm kainatın genişlənməsini ortaya qoyandan sonra durub söylədilər ki, bəs bu barədə Quranda ayə var)))). Bunu anlamalı və qəbul etməlisiniz ki, müqəddəs adı ilə sizə sırınan “Quran” kitabı sıradan adi bir fantastik nağıl kitabıdır. O kitabda möcüzə və elm axtarmağa vaxt, enerji sərf etməyin. Elmi kitablara diqqət ayırsanız qürurlanacağınıza əminəm. Din ilə elmi bir səviyyədə tutmaq olmaz. Onlar bir-birinə əksdir. Çünki din sabit, doğmatik, elm isə skeptik (şüphəçi), araşdıran, sorğulayan sistemdir. Deməyim odur ki, elm başqa bir nəzəriyyə tapıb kainatın genişlənmədiyini də sübut edə bilər. O zaman belə çıxır ki, yuxarıda söz açdığımız və dindarların da ağız dolusu danışdıqları ayə avtomatik səhv olacaq!? Elm bir nöqtədə əbədi qalmaya bilər. Ona həmişə şüphəli yanaşır. Dində isə şüphə etmək yoxdur. Şüphə edənlər artıq kafir sayılır və təkidlə bir çox ayədə şüphə edənlərdən olma deyilir. Məsələn, “Bəqərə” 147-də yazılır: “Haqq sənin Rəbbindəndir! Odur ki, şübhə edənlərdən olma!” Bu o deməkdir ki, küt olun, qul olun. Yoldaşlar, fərqli düşüncə sahibi olmaq üçün hər şeyə şüphə ilə yanaşın və sorğulayın. O zaman həyat sizə rahat və sevimli olacaq.