Yeri düz olanlar

Qədim dövrlərdə yaşadığımız planetin kiçik və müstəvi formasında olması təsəvvür edilirdi. İnsanlar bilgisiz idilər və yaşadıqları ərazilərdən kənarı tanımırdılar. Onların düşüncəsinə görə yaşadıqları torpaq hansısa heyvanın, məsələn, öküzün, tısbağanın, balinanın üzərində durub. Az-çox şumerlilər müəyyən bilgiyə sahib idilər. Onlar dörd cəhət olduğunu və hər cəhətdə bir dünyanın yerləşməsi fikrini söyləmişlər. Şumerlilər düşünürdülər ki, Asiya yarımadası dünyanın mərkəzində, Qara, Aralıq və Egey dənizləri isə onun ətrafında yerləşir.

Qədim dövrün coğrafiyası haqqındakı məlumatlar ilkin olaraq Herodot, Aristotel, Eratosfen, Strabonun əsərlərində ümumiləşdirilmişdir. Məhz onların yazdıqlarında coğrafi hadisələrin təbiətinə dair ilk elmi dəlillər verilmiş və Yer planetinin kürə şəklində olması barədə fikirlər irəli sürülmüşdür. Yerin kürə formasında olması haqda ilk təsəvvürləri eramızdan əvvəl VI əsrdə yunan alimi Pifaqor demişdir. Qədim yunan alimi Aristotel isə ilk dəfə olaraq Yerin kürə şəklində olmasını elmi cəhətdən sübut etmişdir. O, bunu Ayın tutulması zamanı kölgənin dairəvi olması ilə izah etmişdir. Yəni, göründüyü kimi planetimizin kürə (yumuru) formasında olması islamdan da əvvəl bəzi toplumlara məlum idi. Və üstəlik indiki texnologiyanın köməyi ilə Nasanın əldə etdiyi şəkillərin Yerin kürə formasında olmasını sübut etməsinə baxmayaraq, günümüzdə bir çox dindarlar yaşadığımız planetin düz olmasını söyləyirlər və buna inanırlar. İnanclarının qaynağı isə müqəddəs saydıqları “Quran”dan irəli gəlir. Çünki o kitab dünyanı düz olaraq təsvir edir. Bununla əlaqədar bəzi ayələri nəzərinizə çatdırıram:

Rad surəsi 3: Yeri (insanların və başqa canlıların yaşaya bilməsi üçün) döşəyən (uzadıb genəldən), orada möhkəm dağlar, çaylar yaradan, bütün meyvələrdən (erkək-dişi, yaxud şirin-acı, turş-meyxoş və s. olmaqla) cüt-cüt yetişdirən, gecəni gündüzlə (gündüzü də gecə ilə) örtüb bürüyən Odur. Şübhəsiz ki, bunda (bütün bu deyilənlərdə) düşünən insanlar üçün (Allahın qüdrətini və vəhdaniyyətini sübut edən) neçə-neçə dəlillər vardır!

Ğaşiyə surəsi 20: Və yerə (baxmırlar ki) necə döşədilmişdir?

Naziat surəsi 30: Bundan sonra da yeri döşəyib (yayıb) düzəltdi (üstündə gəzmək və yaşamaq üçün onu yararlı hala saldı).

İnşiqaq surəsi 3: Yer uzanıb dümdüz olacağı;

Bəqərə surəsi 22: O Allah ki, sizin üçün yer üzünü döşədi, göyü isə tavan yaratdı, göydən yağmur endirdi və onun vasitəsilə sizin üçün müxtəlif meyvələrdən ruzilər yetişdirdi. İndi siz də Allaha (Onun heç bir oxşarı və bənzəri olmadığını) bilə-bilə şəriklər qoşmayın!

Zəriyət surəsi 48: Yeri də Biz döşədik. (Onu) döşəyənlər necə də gözəldir! (Biz necə də gözəl döşəyənlərik!)

Və sair ayələrdə yerin döşənməsinə, yayılıb uzadılması məsələsinə rast gəlmək olar. Bildiyiniz kimi döşəmək düz yer üçün xarakterikdir. Məsələn, evin polunu döşəmək kimi. Bu bir daha həmin kitabın müəllifinin Məhəmməd olduğunu ortaya qoyur. Əgər dindarların dediyi kimi hər şeyi bilən və yaradan allah var idisə, onda yaratdığı planetin kürə şəkilində olduğunu bilməli və o barədə “vəhy” verməliydi. Ancaq belə bir şey yoxdur. Çünki allah yoxdur və yaradan obrazı Məhəmmədin yeni yaratdığı dində bir uydurmadır.