Əlacsız dindarlar

Jurnalist Vüsal Məmmədov korona virusun nələrə təsir edəcəyi barədə yazıb. Onun sözlərinə görə pandemiya dini inanclılara düşüncə dəyişikliliyi yaşadacaq: "Pandemiyanın nələri zəiflədib, nələri güclədəcəyi haqda maraqlı fikirlər deyilir. Birini də mən deyim: Pandemiya dini zəiflədib, DEİZMİ (baxın, ateizmi demirəm) gücləndirəcək. Niyə?

Pandemiya insanların şüurunda dünyanın işlərinə qarışmayan bir allah obrazını möhkəmləndirdi. Yəni bəli, Allah var, amma o, təbiətin qanunlarına qarışmır - əgər virusun yayılması təbiətin qanunlarına zidd deyilsə, yayıla bilər, Kəbənin və ya Vatikanın bağlanması təbiətin qanunlarını pozmursa, bağlanar. Bunlar insanların məsuliyyət sferasıdır, Allah öz qüdrətilə ora müdaxilə etmir. Siz əgər virusa yoluxdunuzsa, Allaha dua etməyin - bu, onun sahəsi deyil. O, təbiətin fövqündəki ruhlar dünyası ilə məşğuldur.
Bax, elə bu yerdə van minut, axı dinin allahı hər şeyə qarışır! O, insanın nə yeməsinə, nə içməsinə, kiminlə dostluq etməsinə, arvadı ilə necə yatmasına qədər hər şeyinə qarışır. Elə isə, niyə sağlamlığa gələndə, "mən buna qarışmıram" deyib, yaxasını qırağa çəkməlidir? Əgər allah təbiətin qanunlarının gedişatına müdaxilə etmirsə, onda mənim içdiyim pivəni də günaha saymasın, çünki burada təbiətin qanunları pozulmur! Onda məsələn, kəbinsiz sekslə məşğul olmağı da qadağan etməsin - çünki o da təbiətin qanunlarına əsasən baş verir. Niyə allah kiminsə naməhrəmlə öpüşməyinə qarışır, amma virusa yoluxmağına yox?! O, nəyə əsasən müəyyən edir ki, təbiətin hansı qanunlarına müdaxilə etmək olar, hansılara isə olmaz"?!