Allahın virusu

Bu adam Qafqaz Müsəlmanları İdarəsinin sədri Şyxülislam Allahşükür Paşazadədir. Korona virusla əlaqədar danışır (videonu yazının sonuna yerləşdirmişəm, oradan izləyin). Amma baş mollanın danışığından baş açmaq olmur. Cümlələr rabitəsiz, səliqəsiz olmaqla yanaşı, həm də mənasızdır. Əsas odur ki, ağzını açıb danışsın. Cəmiyyət görsün ki, Allahşükür Paşazadə nə isə dedi. “Allah-təala göstərdi ki, mən varam, mən allaham, mənim qüdrətim çoxdu”- söyləməklə o, korona virusun allah tərəfindən yaradıldığını və dünyamıza bir bəla olaraq göndərildiyini düşünür, bunu cəmiyyətə bəyan edir. Deməli, allah virusu yaradıb insanları öldürməklə öz qüdrətini göstərir. Bizi imtahan edir. Eşq olsun! Bəs deyirdiniz ki, allah rəhimlidir falan. Nə oldu?))) Niyə qüdrətini yaxşı işlərlə göstərmir? Məsələn, göydən pul yağdırsın. Heç kim kasıb olmasın. Acından insanlar ölməsin. Xalqa zülm edənlərin qəlbi yumşalsın və sairəyə qədər uzatmaq olar bunu.  

Daha sonra deyir ki: “...evdə qal deyəndə allahla qal, allaha kömək elə”. Yəni, allah qüdrətini göstərmək üçün virusu yaradıb, indi də qarşısını ala bilmir. Ona kömək edin virusdan qurtulaq))). Bu “kafada” olan adam uzun illərdir ki, idarə sədridir və insanları yönəldir, idarə edir. Cənablar, bu “kafada” olan adamlarla villada qalsanız da belə ölkəni Qafqazın lider dövlətinə çevirə bilməzsiniz! Başı biznesə qarışan və ömründə bir dünyəvi kitab üzü açmayan bu adamların danışığı bax bu cür bərbad olmalıdır. Bəlkə də heç “Quran” kitabını da sonadək oxumayıb.

 Videoda A.Paşazadənin dediklərini başa düşməyənlər aşağıdan onun söylədiklərini oxuya bilərlər)):

“Allah-təala göstərdi ki, mən varam, mən allaham, mənim qüdrətim çoxdu. Ona görə də biz bu işləri görməklə bərabər, bu deməklə bərabər, evdə qal deyəndə allahla qal, allaha kömək elə. Amma allah demək deyil ki, sən başını səcdəyə qoy namaz qıl. Yəni, fikirləş qardaşına necə kömək eliyərsən, dostuna necə kömək eliyərsən. Əgər ehsan üçün bir şeyin yoxdursa, dillə, bəlkə birinin, çünki o qədər çətindir bu məsələlər. Mən evdə qalıram, özüm heç evdə qalmayan bir insan, mən evdə qalıram görürəm nə qədər çətinliklər var. Bəzən insanın adi sadəcə bir telefonla ehtiyacı varkı sən ona deyəsən səbr elə, yaxşı olar. Yəni, heç olmasa bunu deməli, qardaş-qardaşa deməlidi, bacı-bacıya deməlidi. Bu bizim üçün böyük bir imtahandı”.