Kölə nömrə bir


“Quran”ı hansı “kafa” ilə oxumağınız maraqlı deyil. Önəmli olan odur ki, həmin kitabın yaşadığımız dövrlə uzlaşmadığını dərk edə bilirsinizmi? Yoxsa, içinizə salınmış, beyninizə yeridilmiş “allah qorxusu” bu barədə düşünməyə imkan vermir sizə?! Mütləq bu barədə düşünün. Dindarlar necə deyirlər: “Quran”ın mənasını, təvsirini yazmaqla, danışmaqla bitirmək mümkünsüzdür. Əslində həmin kitabdakı problemləri demək istəyirlər. Yəni, “Quran”dakı problemləri yazmaq üçün uzun bir siyahı tutmaq lazımdır. Bu mövzuda onlardan birinə toxunacam. Kölə və qul məsələsinə. Müqəddəs hesab etdiyiniz kitab köləliyi təbliğ edir, ona ayaq verir. İnsanlığa aşağılayıcı status gətirən bir şeyi qadağan etmir, əksinə olmalıdır kimi yanaşır. Niyə bilirsinizmi? Çünki Məhəmməd yaşadığı dövrdə kölə, qul, əsir görüb. Və gördüyü barədə yazıb. Sözügedən kitabın Bəqərə 177-221, Maidə-89, Tövbə-60, Nisa-24-25-36-92, Nur-33-58, Rum-28 və sair surələrinin ayələrinə baxsanız “qul”, “əsir”, “kölə” sözlərini görərsiz.  
Məsələn, Nisa surəsi 92-də yazılır: “Heç bir möminə başqa bir mömini öldürmək yaraşmaz. Bu, səhvən (xəta üzündən) olduqda müstəsnadır. Hər kəs bir mömini səhvən öldürərsə, o zaman o mömin bir qul azad etməli və öldürülmüş şəxsin ailəsi qanbahasını sədəqə olaraq bağışlamadıqda, onlara (ölən şəxsin varislərinə) tam şəkildə qanbahası verməlidir. Əgər (öldürülən şəxsin özü) mömin olduğu halda, sizə düşmən olan bir tayfadandırsa, o vaxt (öldürülən şəxs) mömin bir qul azad etməlidir. Əgər (öldürülən şəxs) sizinlə əhd (müqavilə) bağlamış bir tayfadan olarsa, o zaman onun ailəsinə qanbahası verməklə bərabər, mömin bir qul dəxi azad etmək lazımdır. Hər kəs (azad etməyə qul) tapa bilməsə, o, Allah tərəfindən tövbəsinin qəbul edilməsi üçün bir-birinin ardınca (arası kəsilmədən) iki ay oruc tutmalıdır. Allah (hər şeyi) biləndir, hikmət sahibidir!”
Maidə surəsi 89: “Allah sizi bilmədən (səhvən) içdiyiniz andlarınıza görə cəzalandırmaz (məzəmmət, sorğu-sual etnəz), lakin (bilə-bilə və ya qəsdən) içdiyiniz andları (pozmağa) görə cəzalandırar. Belə bir andın pozmağın kəffarəsi ailənizə yedirtdiyinizin orta hesabından on yoxsulu yedirdib doyurmaq, yaxud geyindirmək, yaxud da bir kölə azad etməkdir. Bunları etməyə imkanı olmayan şəxs üç gün (dalbadal) oruc tutmalıdır. Bu, içdiyiniz andların kəffarəsidir. Bununla belə, andlarınızı qoruyun (onları pozmaqdan çəkinin). Allah ayələrini sizə belə izah edir ki, bəlkə, şükür edəsiniz!”
Nəhl surəsi 75: “Allah belə bir məsəl çəkdi: "Heç bir şeyə gücü çatmayan və başqasının malı olan bir qul özünə verdiyimiz gözəl ruzidən (Allah yolunda) gizli və aşkar sərf edən birisi ilə (azad bir insanla) eyni ola bilərmi?! Həmd (hər cür tərif və şükür) yalnız Allaha məxsusdur, lakin (müşriklərin) əksəriyyəti (bunu) bilməz!”
Onu da deyim ki, bu məsələ o qədər idarəedici rol oynayır ki, hətta ictimai statusu olan söz sahibləri insanları kölə olmağa təşviq edən çıxışlar da edirlər. Məsələn, tanıdığınız baş molla Allahşükür Paşazadə tədbirlərdə danışarkən dəfələrlə bildirib ki: “Allah Heydər Əliyevi Azərbaycana böyük istəklə göndərib”, “Allah-Təala bir xalqı istəyəndə həmişə ona müdrik dövlət rəhbəri göndərir ki, o xalq öz doğru yolunu tapa bilsin. Allah-Təala da Heydər Əliyevi bizə doğru yol göstərmək üçün müdrik bir şəxs, rəhbər kimi göndərib”.
Və ya yazıçı, deputat Aqil Abbasın dediyinə baxaq: “124 min peyğəmbərin olduğu deyilir. Quranda isə cəmi 30-40-nın adı var, digərləri bilinmir. Ancaq o da var ki, hər dövrdə Allah bir elçi göndərir. Onun adını Atatürk də qoya bilərsiniz, peyğəmbər də. Məhz Heydər Əliyev də Allah tərəfindən Azərbaycana göndərilən peyğəmbərdir”.
Bu adamlar əsaslandıqları dinə əsasən bu tipli ifadələr dilə gətirərək vətəndaşları qul olmağa, itaət etməyə təşviq edirlər. Və bir nəfər dindar insan səsini çıxardıb etiraz etmədi və etmir. Demədilər ki, ay adını ziyalı qoyan kəslər. Belə sözlər deyərək peyğəmbərimiz Məhəmmədə qarşı hörmətsizlik etməyin. Yer üzərindəki sonuncu peyğəmbər Məhəmməddir, vəssalam! Demədilər. Çünki özləri də kölədir və itaətkardırlar. Bu tipli dindarlar ancaq mən və mənim kimi ateist düşüncəli insanları susdurmağa, döyməyə, təhqir etməyə, öldürməyə qadirdirlər. Onlar həqiqəti duymaq istəmirlər. Ona görə ki, dinin yalanlarını və yarasızlığını ictimailəşdirmək (çoxluq təşkil edən) dindar kütləni idarəedən baş mollalara sərf etmir. Siz dindarlar onların robortlarısız. Baş mollalar nə desələr sorğu-sualsız əməl edən zehniyətsiz. Bu “kafa” ilə cəmiyyətə heç bir yaxşılığınız toxuna bilmir. Yalnız təbii sərvətləri tükətməklə məşğulsuz. Bir az düşünün, araşdırın və insan olun.  

Yorumlar