“Quran”dan seçmələr

Sözüm inanclı insanlaradı. Müqəddəs hesab etdiyiniz “Quran” kitabını oxumağa başlarkən ilk növbədə mütləq və mütləq azərbaycan dilində oxuyun. Kim sizə desə ki, ərəbcə oxusanız savab bonusları qazanacaqsız, günahlarınız bağışlanır falan, inanmayın. Sizi aldadırlar. Mənasını başa düşməyərək və üstəgəl ərəbcə düzgün oxumadığınız şeydən sizə nə fayda ola bilər ki? Azərbaycan dilində oxuduğunuz zaman isə oxumaq naminə oxumayın, mənasına fikir verin. Hərçənd ki, adıçəkilən kitabda bir məna yoxdu. “Quran”ın bir-birindən əlaqəsiz, insanı dolayan və aşağılayan ayələrindən çox misal gətirmək olar. Ancaq istərdim ki, onu oxuyarkən aşağıda qeyd etdiklərimə diqqət yetirəsiz.

Deməli, dindarların dilindən çox eşitmişik. Hər sözlərinin başında və ayağında deyirlər ki, belə bacarıqlısan, çox bilirsən quran kimi bir kitab yaz. Heç kim onun təki kitab yaza bilməz və sairə. Bəs Məhəmməd bunu “Quran” kitabında necə təlqin edir? Bunun üçün bir neçə surəyə nəzər yetirəcəyik. İlk olaraq Tur surəsi 34 - ə baxaq: “Əgər doğru deyirlərsə, qoy onlar bunun (Quran) kimi bir kəlam gətirsinlər”! Yəni, Məhəmməd demək istəyir ki, Quranda yazılan sözlərdən biri sizin də ağlınıza gəlirmi? Bununla insanların gözünü qırır, onlara psixoloji təsir göstərir. Bədii ardıcıllıq baxımından istənilən yazıçı o kitabdakından gözəl sözlər ortaya qoyar. Sadəcə insanları elə qorxudublar ki, sanki bir söz desələr günaha girəcəklər, işləri düz gətirməyəcək və ya başlarına pis olaylar gələcək.   

Məhəmməd “Bəqərə” surəsi 23-də məsələni bir azda böyüdür və yazır ki: “Əgər bəndəmizə (yəni, Məhəmmədə) nazil etdiyimizə (yəni, Qurana) şübhəniz varsa, onda ona bənzər bir surə gətirin və əgər doğru deyirsinizsə, Allahdan savayı bütün şahidlərinizi köməyə çağırın”! Artıq kəlmədən, sözdən keçir surəyə. Bayaqdan söz deyilməsini istəyirdisə indi artıq bir surə istəyir. Bu birbaşa insanları ələ salmaq, onları avara yerinə qoymaqdır. İnsanlarla məzələnməkdir.

Yunus surəsi 38-də də eyni vəziyyətlə rastlaşırıq. Həmin yerdə yazılır: Yoxsa "bunu yalandan düzəltmişdir" - deyirlər. De: "Əgər doğru deyirsinizsə, ona (Qurana) bənzər bir surə gətirin və Allahdan başqa kimi bacarırsızsa köməyə çağırın!"

Hud surəsi 13-də isə Məhəmməd insanların üzərinə daha da gedərək onlardan 10 surə istəyir: Yoxsa, "O, bunu (Quranı) özündən uydurmuşdu" - deyirlər. Onlara de: "Əgər doğru deyirsinizsə, onun kimi özünüzdən on surə uydurub gətirin və (bu işdə) Allahdan başqa, kimi bacarırsınızsa, onu da köməyə çağırın”.

İsra surəsi 88 isə əməlli-başlı ağlamalıdır. Sözügedən ayədə bütövlükdə Qurana bənzər bir kitabın ortaya qoyulması məsələsi qaldırılır:  Onlara de: "Şübhəsiz, əgər insanlar və cinlər Quranın bənzərini gətirmək üçün bir yerə toplaşsalar, hətta bir-birlərinə kömək və arxa olsalar belə, onun bənzərini gətirə bilməzlər".

Gördüyünüz kimi insanların üzərinə getmək, onları qorxutmaqla bir növ aşağılayırlar. Eyni zamanda qorxu içərisində saxlayırlar. Cəmiyyətə və dünyaya zorakılıq və terrordan başqa bir töhfə verə bilməyən kitabın, dinin təbliğatına milyonların xərclənməsinin yalnız bir səbəbi var. Kitabdan da göründüyü kimi insanları qorxudaraq itaətdə saxlamaq, onlar üzərində idarəetməni rahatlaşdırmaq. Odur ki, seçiminizi doğru edin və ailənizə, daha sonra isə cəmiyyətə yararlı insan olun.