Namizəd müəllim

Bildiyiniz kimi Parlament buraxıldı və 2020-ci ilin fevralın 9-na “deputatxanaya” seçkilər təyin edildi. Hələ ötən ilin yay aylarında bu barədə dedi-qodu mətbuatda dolaşmağına baxmayaraq, YAP-ın sözçüsü Əli Əhmədov söyləmişdi ki, Milli Məclisin özünü buraxmasından söhbət gedə bilməz. Hər şey əladı. Amma reallıq odur ki, üstündən bir neçə ay keçəndən sonra deputatları yenidən seçməyə qərar verdilər. Bu məsələ ilə bağlı hərə bir versiya irəli sürdü, müxtəlif fikirlər bildirildi. Parlamentin buraxılmasını islahatların bir qolu kimi təqdim edənlər də oldu. Ancaq fikirimcə burada məqsəd başqadır. Xatırladığınız kimi 2019-cu ilin oktyabr ayında Ramiz Mehdiyev Prezident Administrasiyasının rəhbəri vəzifəsindən azad edildi və Elmlər Akademiyasına göndərildi. “Xodlar” ondan sonra başladı. Hər kəsə bəlli idi ki, Ramiz Mehdiyevin mətbuatdan tutumuş, rayon icra başçılarına, Milli Məclisin deputatlarına qədər kadrları var. Onlardan yaxa qurtarmaq lazımdır. Bəs necə? İcra başçısını işdən azad edə bilərsən. Deputatları nə edəsən? Bəli, yeganə variant onları buraxmaq və yenidən R.Mehdiyevin kadrlarından kənar millət vəkili formalaşdırmaq lazımdır. Bu hay-küydən həvəsə gəlib namizədlik xəyalına çox adam daldı. Kimi dindirirsən “deputatlığa namizədəm” deyib fikirə gedir. Elə düşünürlər ki, əgər Parlament istefaya gedibsə, deməli növbəti seçkilər yüz faiz şəffaf olacaq. Onların səsinə toxunmayacaqlar. Bu xülya ilə elə adamlar namizədəm deyir ki, insan çaş-baş qalır. Bunlarla yanaşı 4-5 dəfə deputat olan vətəndaşlar varkı onlar yenidən namizədlik siyahısına salınıblar. Məsələn, Hadı Rəcəbli (74 saylı Lənkəran-Masallı seçki dairəsi), Vasif Talıbov (1 saylı Şərur-Sədərək seçki dairəsi), Fəzail Ağamalı (60 Saylı Salyan-Neftçala seçki dairəsi), Fəttah Heydərov (116 saylı Qəbələ seçki dairəsi), Ziyafət Əsgərov  (76 saylı Lənkəran-Astara seçki dairəsi), Eldar İbrahimov (4 saylı Naxçıvan şəhər seçki dairəsi), Madər Musayev (10 saylı Binəqədi üçüncü seçki dairəsi), İmamverdi İsmayılov (125 saylı Zəngilan-Qubadlı seçki dairəsi), Mixail Zabelin (34 saylı Xətai ikinci seçki dairəsi).

Bu adamların içərisində yaşı 70-dən yuxarı olanları var. İndi deyə bilərsiz ki, deputatxananı cavanlaşdırmaq istiqamətində islahatlar aparıldığı deyilirsə, bu qocalara niyə namizəd olmaları üçün icazə verilib? Bəlkə də cavabı tapmayacaqsız. Odur ki, deyim. Seçkidə şəffaflıq yaratmaq naminə qoca stajlı yapçılara namizəd olmaları üçün şərait yaradılır. Və seçkidə onlardan bəziləri müxalif və ya bitərəf rəqiblərinə uduzacaqlar. Bununla da mətbuat seçkinin şəffaflığından, demokratikliyindən ağız dolusu yazacaq. Hamı özünü xoşbəxt hiss edəcək. Hərə özünün bir loxma çörəyinin hayında olacaq. Kimsə fikirləşməyəcək ki, Azərbaycan Həmkarlar İttifaqları Konfederasiyasının sədri Səttar Möhbalıyev niyə deputat olmaq istəyir? Bir dəfə də olsun ağlınıza gətirmirsiz ki, 95 saylı Tərtər seçki dairəsindən jurnalist Sahib Alıyev niyə seçilməlidir? Düzü mən də bilmirəm. Amma düşünürəm ki, bu çağırış Parlamentdə çoxlu yeni və aktiv simalar görə bilərik. Deputat hədiyyəsinə hazır olun.