Yalançı şahidlər

Kütlə arasında xarakterik bir dəb var. Ramazan və məhərrəmlikdə spirtli içki içməzlər. Təklif edən olsa, “qoy oruşdux çıxsın içərik”-deyə, cavab verərlər. Həmin ərəfələrdə özləri oruc ayinlərinə əməl etməsələr də dost-tanışa axşam yemək almaqla savab bonusları qazanmalarına əmin olurlar və buna görə üzləri gülər, sevincək duruma düşərlər. Bəzən də 5-20 manat arası pulu kasıb hesab etdikləri adama verərlər. Buna el arasında “evdən pul çıxarmaq” deyirlər. Düşüncələrinə görə bu etdiklərinə görə yenə də günahları savab bonusları ilə əvəzlənir. Kütlənin bəzi nümayəndələri isə həftədə bir dəfə cümə namazına gedər və dost-tanışı ilə söhbətləşərkən tez-tez “cümədəydim”  deyərək özünü dindar kimi reklam edib gözə soxar. Amma kütlənin demək olar ki, hamısına məxsus bir trendi var: sən cüməyə getməyə bilərsən, namaz qılmaya və oruc ayinlərinə əməl etməyə bilərsən, lakin kəlmeyi-şəhadəti mütləq bilməlisən.  Hətta adamlar var ki, gecə yatanda dodağının altında kəlmeyi-şəhadəti söyləyib sonra yatır. O düşüncə sahiblərinin fikirlərinə görə yatmazdan əvvəl ona görə kəlmeyi-şəhadəti deyirlər ki, işdi, əgər yatarkən ölsələr müsəlman kimi getsinlər. Əslində allahdan qorxduqları üçün mənasına fikir vermədən sadəcə söyləyirlər. Bəs kəlmeyi-şəhadətdə nə deyilir? Deyilir ki: əşhәdü әn la ilahә illәllah, əşhәdü әnnә muhәmmәdәn rәsulullah. Ana dilimizə tərcüməsi belədir: şәhadәt verirәm ki, allahdan başqa ilah yoxdur, şәhadәt verirәm ki, Məhәmmәd allahın elçişidir. Yəni, şahidlik edirəm ki, allahdan başqa allah yoxdur və ona da şahidlik edirəm ki, Məhəmməd allahın elçisidir, peyğmbəridir. Bax burada durmaq lazımdır. “Ruçnoy”larınızı çəkin və düşünün. Allah dediyiniz bir şeyi gözlə görürsünüzmü və ya görmüsünüzmü? Əlbəttə ki, yox! Yaxşı, o zaman görmədiyiniz bir obyektə necə şahidlik edirsiniz!!! Yalançı şahidlik etməklə saxtakarlıq etdiyinizi anlamalısınız! Bəs deyirdiz dində yalan yoxdu, siz dindarlar da yalan danışmırsız. Onda peyğəmbər adlandırdığınız Məhəmmədi görmüsüz? Görmədiyiniz halda necə “Məhəmmədin allahın peyğmbəri olmasına” şahidlik edirsiz?  Siz ancaq öz düşüncənizdə olan adamları aldada bilərsiz.

Mövzu ilə əlaqədar Türkiyədə bir olay yaşanıb.(həmin videonu yazının axırına yerləşdirmişəm). Adamın biri çıxıb sosial şəbəkələrdə deyib ki, allahın var olmasına və Məhəmmədin onun elçisi olmasına dair yalançı şahidlik edə bilmərəm. Nağılbaş dindarlar isə bu yoldaşı məhkəməyə veriblər. Yoldaş da çox yaxşı deyib ki, allahı məhkəməyə gətirin gözümlə görüm şahidlik edim)))). Di gedin)).