Cadügər məmurlar

Artıq bir neçə gündür sosial şəbəkələrdə Elman Əliyev adlı özünü ekstrasens adlandıran şəxsin videoları dolaşır. “Youtube”da jurnalist və siyasi fəal Natiq Ədilovun həmin ekstrasenslə söhbətini maraqla izlədim. Qeyd edim ki, Elman Əliyev özünün və ailəsinin həyatına təhlükə yarandığı üçün Fransa dövlətinə sığınıb. Məhz bu məqamdan yararlanan Fransada yaşayan jurnaslit Natiq Ədilov isə ekstrasensi taparaq üzərinə suallar yağdırıb. (Yazının sonunda ekstrasenslə müsahibəni izləməniz üçün linkləri qeyd etmişəm). Elman Əliyev fotolar və videolarla sübut edir ki, nə az, nə çox düz 9 il Vergilər Nazirliyində, keçmiş vergilər naziri Fazil Məmmədovun bilgisi daxilində ekstrasens işləyib. Bu fəaliyyəti ilə həm nazirliyin himayə etdiyi idman növlərini dünya arenasında qalib edirmiş, həmdəki nazirliyi və nazir də başda olmaqla nazirlikdəki bir neçə iri məmurları kənar pis qüvvələrdən qoruyurmuş. Nazirlikdə müxtəlif magik ayinlər həyata keçirdiyini söyləyən ekstrasens işinin müqabilində kifayyət qədər pul alırmış. Amma buna baxmayaraq Elmanı Vergilər Nazirliyindən incik salan məqam da elə pul olub. Ekstrasensin iddiasına görə Vergilər Nazirliyindən xidmətinə rəğmən ona çatacaq 20 miliyon manat mənimsənilib. Həmin məbləği istədiyi üçün münasibətləri korlanıb. Əminəm ki, çoxlarınız bunu oxuyanda və ya məlum müsahibənin videosunu izlədikdə məsələnin real olmadığını düşünüb, üstəlik “orta əsrlərdə, zadda yaşamırıq” deyərək, gileylənəcəksiz. Haqlısınız. Amma video görüntülər reallığın faiz dərəcəsini artırır. Məsələ ondan ibarət deyil ki, biz Elmanın fövqal gücünə və onun öz magik ayinləri ilə hansısa məsələyə təsir etdiyinə inanırıq. Qətiyyən yox! İnanmırıq. Məsələ ondan ibarətdir ki, buna inanan və bunun üçün yüz minlərlə pul xərcləyən məmurlar var. Hansı ki, o məmurlar dövləti idarə edir, bizə rəhbərlik edirlər, ölkənin iqtisadi-sosial həyatının müqəddəratına qərar verirlər. Cadügərliyə meyilli olan bu adamların başı orta əsrlərdə qalıbsa, onlardan hansı inkişafı, hansı yeniliyi gözləmək olar? Elmanın dediklərindən belə başa düşürük ki, ölkə münəccimlər, ekstrasenslər ordusu olan məmurların savaşı üzərində idarə edilir. Və büdcədən şişirdilmiş layihələr hesabına oğurladıqları milyonlarla pulu ekstrasenslərə sərf edirlər. Həmin milyonlarla pulun hesabına büdcədən maliyyələşən vətəndaşların əmək haqqını və müavinətini artırmaq olardı. Ancaq onlara bu maraqlı deyil. Cadügərliklə kreslolarını qorumağı və magiya ilə vəzifəcə yüksəlməyi boş başlarına yerləşdiriblər. Halbuki, başlarını orta əsrlərdən gətirib indiki zamana yerləşdirsələr bilərlər ki, ölkənin inkişafı, əhalinin sosial rifahının yaxşılaşması naminə etdikləri işlər onların yaxşı və uzunmüddətli məmur olmasına ən gözəl zəmanətdir. Lakin boş başları ilə bunu düşünə bilmirlər. Əfsuslar olsun ki, elmi və texnoloji bir əsrdə yaşamağımıza baxmayaraq ölkə orta əsr təfəkkürü ilə idarə olunur. Ölkənin yenilənməyə çox ehtiyacı var. Yeni və dindən uzaq düşüncə sahibləri dövlətə öz töhvələrini verməlidirlər. 

https://www.youtube.com/watch?v=miHvToqZTQo

https://www.youtube.com/watch?v=u4SNSryTlPY&t=21s

https://www.youtube.com/watch?v=FAL8wvliZbA

https://www.youtube.com/watch?v=5dULptZO5S4&t=5s