Bir addım öndə

Canlılar içərisində insan şüurlu varlıq olmasına baxmayaraq, türklər demiş ən gerizəkalı canlıdır və insanı başa düşmək çox çətindir. Heç bir canlını allah və ya cənnətlə aldada bilmərsən. Təsəvvür edin, insanlar görünməz və bilinməz allaha, tanrıya inanırlar, amma bir-birlərinə inanmırlar. Gözləri önündəki, bildikləri insanlara “yox” kimi baxırlar. İçində olduqları təbiəti isə göz görə-görə öz mənafeləri naminə məhv edirlər. Bu varlıqlardan baş çıxarmaq mümkün deyil. Azərbaycan da isə heç mümkün deyil. Ölkədə çox az sayda normal adam taparsankı oturub dərdləşəsən. Hərənin başından bir avaz gəlir. Olmayan təsəvvürlərə inanan varlıqlar arasında yaşamaq, mübariz olmaq, maarifləndirmə işləri aparmaq məşəqətlidir. Dinə yoluxmuş insanların yenidən həyata qayıtması çətindir, ancaq mümkündür. Kiminsə təsirinə düşüb dinə girmək keçmişin və bu günün dəbidir. Çünki insanların çoxu oxumur, oxumaq istəmir. Həcilərin, məşədilərin moizələrinə, söhbətlərinə qulaq asıb ağlamaq istəyirlər. Onların din barədəki rəvayətlərini, nağıllarını dinləyib özlərini dahi hesab edirlər. Beyinləri o qədər passivdir ki, nağılla reallığı fərqləndirə bilmirlər. Ateistin və ya deistin təsirinə düşərək dindən uzaqlaşan adam da eynən həcilərin söhbətinə qulaq asıb ağlayan kütlə kimidir. Yəni, oxumadan. Oxumağa həvəsi yoxdur. Sadəcə dinsiz birinin söhbətlərinə qulaq asıb və bu söhbətlər onun din barədəki şübhələrini alt-üst etdiyi üçün dini əqidəsindən uzaqlaşır. Özü fərd olaraq araşdırmağa, oxumağa artıq ehtiyac duymur. Bəli, belələri kiminsə təsirinə düşərək dinə gələnlərin sayından çox az olsa da, təssüf ki var.  Burada dövlətin üzərinə böyük məsuliyyət düşür. Hamının evinə daxil olan televiziyalarda şounun, dinin deyil, elmin təbliği dövlətə daha artıq sərfəlidir. Dindar kütlə hakimiyyətə hakimiyyətdə qalmaq üçün, onları “allah” deyərək istədiyi kimi idarə etmək üçün lazımdır. Belə toplumdan cəmiyyətin və dövlətin naminə inkişaf gözləmək mümkünsüzdür. Onlarda beyin olsaydı ilk əvvəl öz düşüncələrini dəyişib inkişaf edərdilər. Elm isə insanları aydınladan, cəmiyyətin gözünü açan, dövləti qüdrətləndirən vasitədir. Dərd orasıdır ki, ölkəmizdə təhsil və elm də bərbad vəziyyətdədir. Orta məktəbin təhsil proqramları o qədər çətin və yorucudur ki, uşaqların beyni error verir. Lazımlı elmlər tədris edilmir. Bütün bunların fonunda sağlam düşüncəli insanların yetişməsinin və mövcud olmasının özü əslində bir möcüzədir. Və sonda belə bir qərara gələk ki, kiməsə bel bağlamadan hərə öz işini görməlidir. Yəni, cəmiyyətdə normal düşüncə sahibi olmaq istəyirsənsə dövlətin bu istiqamətdə edəcəyi təbliğatları gözləmə. Öz üzərində işlə. Araşdır, oxu və düşüncəni sivilləşdirərək ailəndə və cəmiyyətdə mədəni inkişafa yol aç.