Sünnət zorakılığı

Sünnət məsələsi hər zaman gündəmdə olduğu üçün yenidən o mövzuya qayıdıram. Və yenə də deyirəm ki, oğlan uşaqlarının cinsiyyət orqanının ucunu dini rituallara görə və ya sadəcə kefinizdən durub kəsdirmək faydasızdır. Uşaqların icazəsi olmadan bədən üzvlərində hər hansı dəyişiklik etmək hüquqlarının pozulması ilə yanaşı, onlara qarşı edilmiş şiddətdir, zorakılıqdır. Düşüncəsi sıfırın altında olan valideynlər oğlan övladlarına sünnət edərkən deyirlər ki, “uşaq müsəlman oldu”. Daha bilmirlər ki, sünnətin kökü 4500 il bundan əvvələ gedib çıxır. Bunun islam dini ilə heç bir əlaqəsi yoxdur. Sünnətlə bağlı ilk məlumatlar Ankmahor məzar daşı üzərinə işlənmiş qabartmalarda müşahidə edilib. Digər qrup insanlar isə sünnətin sağlamlıq üçün faydalarını önə çəkirlər.

Türkiyəli professor doktor Erbuğ Kəskin “sünnətin sağlamlıq üçün yararı varmı?” sualı barədə danışarkən bunları deyib: “Sünnətin sidik yolları iltihabının qarşısını aldığı doğrudu. Ancaq sidik yolları iltihabı bir yaşından sonra heç olmur. Bir yaşına qədər olan uşaqlarda isə bu 1 faiz müşahidə edilir. Bunu isə antibiotiklə müalicə etmək mümkündürsə uşağı sünnət etməyə nə gərək var. Sünnəti sidik yolları infeksiyasının qarşısını almaq üçün ritual olaraq istifadə etmək son dərəcə məntiqsizdir”. Doktor daha sonra qeyd edir ki, cinsi yolla yoluxan xəstəliklərdə də sünnətin bir üstünlüyü yoxdur: “Bu xəstəliklərin tamamında prezervativ istifadə etmək sünnətdən daha çox qoruyucudur. Yəni, oğlan övladlarınıza prezervativdən istifadə etməyi öyrətmək sünnət etdirməyinizdən daha faydalıdır”.

Bu istiqamətdə maarifləndirmə işləri geniş aparılmalıdır ki, valideynlərin kütlüyü ucbatından uşaqların hüquqları kobud şəkildə pozulmasın.  Ancaq insanların çoxu hansı təhsil almalarına baxmayaraq (yəni, orta və ya ali) kütlə təfəkkürü ilə yaşayırlar. Buna görə də bu və ya digər mövzuda nə qədər aydınlatma aparılsada onlar “xalq adət-ənənəsi”nə əməl etməyi daha üstün tuturlar. Doktor Erbuğ Kəskinin həmin fikirləri üzərinə facebook sosial şəbəkəsində “Virtual Hospital” qrupu sorğu-müzakirə açmışdı.

Təsəvvür edin Azərbaycanda “Sünnət faydalı və vacibdir. Uşağın istəyini öyrənməyə ehtiyac yoxdur”- deyən, yüzlərlə diplomlu həkim var imiş. Bu artıq faciədən də o tərəfədi. Təbii ki, öz uşağının istəyini öyrənmədən ona qarı zorakılıq tətbiq edən həkimin düşüncəsi sıfırın altında olacaq və peşəsinə də həmin düşüncədən yanaşacaq. Nəticədə ölkəmizdə xəstəni səhv müalicə edən, sağ ayağı əvəzinə sol ayağını amputasiya edən doktorlar olur. Düşüncə, insanın ali məktəb bitirməsi ilə ölçülmür. Adam ali məktəbi qırmızı diplomla başa vura bilər, lakin düşüncəsi “uşağa sünnət edirəm ki, müsəlman olsun” – deyəcək ölçüdədirsə o kütlədən cəmiyyətin və dövlətin inkişafı naminə heçnə gözləməyin. Ancaq onu da nəzərə alın ki, düşüncəni dəyişmək mümkündür. Bunun üçün hər bir şəxs öz üzərində işləməlidir. Ümid edirəm ki, ölkəmizdə aparılan maarifləndirmə işlərinin nəticəsi olaraq bir gün sağlam düşüncəli cəmiyyətdə yaşamağımızdan qürur duyacağıq.