Benzin vurğunları

Ötən ilin noyabr ayında Fransada günlərlə davam edən “Sarı jiletlilər”in etiraz aksiyasını əminəm ki, xatırlayırsız. Bu sözügedən ölkədə son illər ərzində baş verən ən geniş və dağıdıcı etiraz aksiyası idi. Mədəni fransız xalqını küçələrə çıxmağa, sərt etiraz etməyə vadar edən səbəb isə hökumətin yanacaq qiymətlərini qaldırması barədə qərar verməsi olmuşdur. Aksiyaların nəticəsi olaraq Fransa hökuməti bu ilin yanvarın 1-dən etibarən qüvvəyə mindirəcəyi yeni yanacaq vergisinin tətbiqini müəyyən vaxta qədər təxirə saldı. Bu belə.

Eyni vəziyyət hazırda İranda da yaşanır.  Belə ki, benzinin bahalaşmasına qarşı başlamış etiraz aksiyaları artıq İranın bir çox bölgələrinə yayılıb. İnsanlar kütləvi şəkildə küçələrə çıxaraq buna sərt reaksiya verirlər. Baxmayaraq ki, İranda ölüm hökmü qüvvədədir və molla rejimi əhaliyə qarşı amansız davranır, lakin göründüyü kimi insanlar bundan qorxmur və etirazlarını ən sərt şəkildə, yəni maşınları, dövlət binalarını yandırmaqla, zərər verməklə həyata keçirirlər. Bəlkə də bu hərəkat dinə söykənərək insanlara zülm edən molla rejiminin sonunu gətirdi və azad, sivil İran dövlətinin qurulmasına bir səbəb oldu. Gedişatdan bu bəlli olacaq.

Əslində dövlətin əsasını təşkil edən xalqı razı salmayan sosial məsələlər və xidmətlər olduqda buna etiraz edilməsi normaldı və qaçılmazdır. Müşahidə etdiyimiz ölkələrdə hökumət yanacağın qiymətini qaldıranda əhalisi küçəyə çıxıb sərt şəkildə etirazını bildirir. Bəs bizim ölkədə vəziyyət necədir? Bizim ölkədə isə hökumət benzinin qiymətini artırmaq anonsunu verəndə sürücülər qonşudan da əlavə 2 kanistr götürüb cumurlar zapravkaya. Bax fərqimiz budur! Etiraz etmək əvəzinə gecə cumur zapravkaya bakı tam doldurur və əlavə 3-4 kanistr yanacaq alır. Üstəlik sabahısı gün tanışları ilə söhbət əsnasında bu hərəkətini fəxrlə, dövlətə qalib gəlmiş kimi nəql edir. Düşüncələri sıfırın altında olan millətimin maşın sahibləri anlamır ki, “uspet” edib 20-30 qəpik aşağı aldığı benzin 7-10 günə, lap elə deyək 1 aya bitəcək. Bəs sonra nə olacaq? Səhv anlamayın. Məqsədim Azərbaycan millətini aşağılamaq deyil, onların nə qədər düşüncəsiz və vecsiz olduğunu göstərməkdir. Sosial vəziyyətin yaxşılaşdırılması üçün ölkəmizdə istənilən qədər təbii və maddi resurslar var. Əgər hökumət bu istiqamətdə addımlar atmırsa xalqın sosial rifahın yaxşılaşdırılması üçün etiraz etməsinə onlarla səbəb vardır. “Nəyimə lazımdı” düşüncəsi ilə yaşayan toplumlardan hərçənd ki, belə şeylər gözləmək lotoreyada cekpot gözləmək kimi bir şeydir. Amma bir xalqın bu qədər vecsiz yaşaması adamda təəccüb doğurmaya bilmir. Sizlər də fransız, ingilis, niderlandlı kimi insansız. Onlardan üstün olmağa niyə cəhd etmirsiz axı?