Torpaq yeyənlər

Mingəçevirdə Heydər məscidinin axundu Ələmdar Qiyasovun bu videosu qarşıma çıxdı. Adam ölkəmizin iri şəhərlərindən birinin ağsaqqalı hesab edilir. Cümə günləri adamları başına yığıb məsləhətlər verir, ağıl dərsi keçir, istiqamət verir. İndi bunun danışığına baxın. Deyir ki, heç bir torpağı yemək olmaz, haramdı. Yalnız Kərbalanın torpağı yeməlidi. Gic və avvam kütlə isə həsədlə yığışıb Ələmdarın söhbətlərinə qulaq asırlar. Bu insanları birbaşa ələsalmaqdı, onları dolamaqdı. Küçədə istənilən bir adamı saxlayıb desən ki, torpağı ye, səni bəlkə də hirsləndiyindən vurar. Desən ki, mən torpaq yeyirəm, gülüb sənə dəli deyəcək. Amma buna baxmayaraq, axund Mingəçevir əhalisini ələ salır, heç kim durub ona başa salmır ki, “ay axund, dəli olmusan, yoxsa bizi gic hesab edirsən? Kərbala torpağı əladırsa, onda bir kamaz gətizdir və ailəlikcə bütün günü torpaq yeyin şəfalı olun”. Cəmiyyəti keçmişə, avvamlığa sürükləyən belə axundları bir yerə yığıb uzun müddət ac saxlamaq və sonra torpaq vermək lazımdır ki, yeyib ağıllansınlar. Onlara verilmiş statusdan istifadə edərək insanları dolamasınlar.

Elə bilirsiz ki, cəmiyyətə reallığı çatdırmaq asandı? Üzləşilən çətinliklərə baxmayaraq, XIX əsrdən bura mollaların, nağıl danışan din adamlarının yalanları barədə Azərbaycan ədəbiyyatında, mətbuatında yazılar gedib və indi də davam edir. Ancaq cəmiyyətin çoxluğu, başqa sözlə desək, kütlə sanki beyinlərini mollalara həvalə ediblər. Mollaların nağıllarına uyan çoxluq tupoy cəmiyyəti formalaşdırmaqla yanaşı ölkənin idarə edilməsini asanlaşdırırlar. Bu kimlərəsə sərfəlidir. “Torpaq yeməklə şəfa tapacağına” inanan xalqın haqqını əlindən al susacaq və istənilən şəkildə idarə edilməsinə baş əyəcək. Amma “Quran”dan bir ayə yazıb onun Məhəmmədin öz məqsədləri üçün “göylərdən endirdiyini” desən, sənə kafir deyib başına oyun açarlar. İnsafınız olsun, maariflənin. Mən və ya mənim kimi ateist bloqerlər bu riski gözə alıbsa, demək biz ölkəmizi, xalqımızı sevirik. Və hər şeyin yaxşısını, inkişafını istəyirik. Moizələrə, nağıllara qulaq asaraq aşağı saladığınız başınızı astaca yırğalamayın. Başınızı dik tutun ki, kəlləniz mollaların ipinə asan düşsün.