Azərbaycanlı

Azərbaycanlılar elə bir unikal varlıqdırlar ki, onların həyat tərzlərindən 3-4 kitab yazmaq olar. Bu barədə “yalnız Azərbaycanda” adı altında çoxları qeydlərini paylaşıb. Amma yazdıqca bitmədiyi üçün düşünmürəm ki, təkrarçılıq edirəm. Məsələn, avtobusda istər-istəməz iki qadının söhbətinə qulaq şahidi oldum. Biri digərinə deyir ki: “nazir, deputat bizim kimi yaşadısa, onda onun nəyi nazirdi ki? Nazirin villası da olar, maşınları da”. Elə bilməyin ki, o qadın bu sözləri rişxəndlə, yumorla deyirdi. Yox! Tam ciddi və içindən gələni söyləyirdi. Və üstəlik yuxarı eşalon məmurların evlərini, mülklərini gürüntülü lentə alanları da qınayırdı. Millətin əksəriyyəti bu tipin düşüncəsindədir. Ali məktəb müəllimlərimdən biri konkret pul götürmürdü. Yadımdadır ki, tələbələr onun haqqında “qansız” obrazı yaratmışdılar. Məhz azərbaycanlı rüşvət almayan insanı əclaf və qansız hesab edir. Niyə? Çünki öz əyri işini pul verib düz etmək istəyir. Rüşvətsiz ölkə, demokratik respublika falan deməklə olmur bu işlər. Ətrafınıza baxın. Tanıdığınız insanları nəzərdən keçirin. Və o zaman sizə aydın olacaq ki, rüşvətin mövcud olmasında millətin (kütlənin) marağı var. Oxumayan tələbə pul götürən müəllimin olmasını həmişə arzulayacaq. Uşağını əsgərlikdən saxlatdırmaq istəyən və ya əsgərlikdə "yaxşı yerə" saldırmaq istəyən valideynlər hər zaman pulu qəbul edən işçini tapacaq və onu var edəcəklər. Bu tip düşüncə adamları rüşvətin yox olmasını heç zaman istəməzlər. Belə misallar çox gətirmək olar.  Ona görə də dövlət səviyyəsində nə islahatı keçirilməsindən asılı olmayaraq nəticəsi olmayacaq. İlk islahat cəmiyyətin düşüncəsində aparılmalıdır. Ümumilikdə cəmiyyət (kütlə) bu düşüncədədir. Kütlənin özü rüşvətin mövcud olmasında maraqlıdır. Və eyni zamanda yalnız Azərbaycanda rüşvət almayan adama “fərsiz” deyirlər. Bu istiqamətdə mövzumuzu davam etdirsək deyəcəyik ki:

Azərbaycanlı yeganə varlıqdır ki, özünə ev, obyekt tikmək üçün bütöv bir ölkəni söküb dağıtmağa həmişə hazırdır.

Qonşusunun və ya qohumunun uğurunu özünə dərd edən vətəndaş ancaq azərbaycanlı ola bilər.

Yalnız Azərbaycanlı əsgər gedəndə musiqili qonaqlıq verir və ancaq Azərbaycanda əsgərlik “kişilik məktəbi” adlanır.

Azərbaycanlının fikrincə homoseksual insan öz vətənini sevə və müdafiə edə bilməz və kütlənin düşüncəsinə görə, cinsi oriyentasiyasını dəyişmiş insan eyni zamanda vətənə də xəyanət edir.

Dünyada ancaq azərbaycanlı futbol azarkeşi ölkəsinin yığma komandası ilə “Neftçi” arasındakı fərqdən xəbərsiz ola-ola, “Yuventusun” bütün oyunçularının ayaq ölçülərini əzbərdən bilir.

Yalnız Azərbaycan jurnalisti  Ermənistandakı pis hadisələri böyük sevinclə xəbər verir və bu zaman ölkədəki vəziyyət barədə susur.

Yalnız Azərbaycanda parkı azərbaycanlılardan qorumaq üçün oraya polis və mühafizəçilər nəzarət edir.

Məlum olduğu kimi, ancaq azərbaycanlı doğulduğu rayonun adını kafeyə qoyub oranı fahişəxanaya çevirə bilər.

Qarşısındakı adama onun telefonuna görə dəyər vermək isə müasir azərbaycanlı düşüncəsinin məhsuludur.

P.S. Burda söhbət bütün azərbaycanlılardan yox, amma təəssüf ki, böyük əksəriyyətdən gedir.