Qorxaqlar

Əlini  “Quran” kitabına qorxa-qorxa vuran adamı görəndə gülməkdən üzümün və qarnımın əzələləri ağrıyır. Adi bir kitaba belə münasibət sərgiləmək bütləşmədir. İndi açıqlamasını verim. Millətin kitab oxumağa həvəsi yoxdur. İnsana mənfi enerji verən, insanı hədələyən sözlərlə dolu “Quran” kitabını oxumağa isə heç həvəsləri yoxdu. Eləcə mollalardan, nağılbaşlardan eşidiblər ki, “Quran” müqəddəsdir, filan. Və olmayan beyinlərində elə formalaşdırıblar ki, məhz o kitab digər bütün növ kitablardan fərqlidir, toxunulmazdır, ona əl vuranda yüz ölçüb-biçmək lazımdır və sairə. Bunların ağlınca sanki o kitab göydən gəlib və allah özü yazıb. “Quran”a o qədər qeyri-adi yanaşırlar ki, hətta ona and içirlər. Mübahisəli məsələlərdə tərəflər haqlı olduqlarını sübut etmək üçün, yalan danışmadıqlarını bildirmək üçün qüsul alıb kitaba əl basırdılar. Və gözləyirlər görək kimə nə olacaq. Bu düşüncə sahiblərinin ağlına görə adam yalandan “Quran”a əl basırsa, and içirsə mütləq ona nəysə olacaq. Ya faciəvi şəkildə öləcək, ya da şikəst olacaq.

Amma ömürlərində bir dəfə də olsa “müqəddəs” saydıqları kitabı açıb oxusalar öyrənəcəklərindən biri bu olacaq: “Quran”da yazılanların çox faizi “allahdan qorxun”, “qorxun məndən” (allah özünü nəzərdə tutur mən dedikdə), “məndən qorxun”, “allah sizi özü ilə qorxuzur” və sairə bu kimi “qorxmaq”, “qorxuzmaq” sözündən ibarətdir. Və oxuduqdan sonra düşünməlidirlər. “Mən allahı sevirəmsə, ondan niyə qorxmalıyam”? “Qorxduğum bir şeyi sevə bilərəmmi”?

Bəli, insan kimdənsə qorxursa onu sevə bilməz. Əksinə nifrət edəcək. Məsələn, Azərbaycanda hamı polisdən qorxur. Çünki əmindir ki, bəzi polislər onu şərləyə bilər, cibinə, evinə, maşınına narkotika ata bilər, başına ağlagəlməz müsibətlər aça bilər. Buna görə də polisdən qorxurlar və onu sevmirlər, nifrət edirlər. Küçədə polis görəndə sanki şər qüvvə görürlər. İndi məsələdən qayıdaq mövzumuza. Əgər deyirlərsə ki, tanrı yaratdıqları içərisində ən mükəmməli olaraq insanı xəlq edib, onda niyə insanı özü ilə qorxuzur? İnsanları qorxuzmaqla ona itaət etmələrini istəyirmi? Allah və “Quran” mövzusu mənim üçün adı bir sözdən başqa bir məna ifadə etmir. Odur ki, sualı sizə ünvanlayıram ki, düşünəsiz və özünüzü islah etmək gecdirsə heç olmasa uşaqlarınızı düzgün istiqamətləndirin. Onları elmə yönəldin. Qorxu sizi nağıllar aləminə aparıb atacaq quyuya. Elm isə sizə sağlam düşüncə və qorxusuz həyat verəcək.