Ovulmuş baş

Dini inanc, dünyanın yaranışı və insanın bu dünyadakı yeri barədə fikirlər şəxsi düşüncələrdir. Bu fikirlər eyni deyildir. Hərə bir cür düşünür. Düşünsünlər. Bunun cəmiyyətə bir isti-soyuğu yoxdur. Yetər ki, insan beynindəki o düşüncələr başqasına ziyan vurmasın, cəmiyyətin sivil inkişaf yoluna daş atmasın. Ancaq hazırkı Azərbaycan cəmiyyətində dindarların (dini fanatiklər nəzərdə tutulur), din virusuna yoluxmuşların ictimai hərəkətləri, nağılbaş təfəkkürləri ölkəmizi geriyə aparmaqla yanaşı, insan kimi insanlarda qıcıq da yaradır. İctimai yerlərdə uzunsaqqallı, donfason paltar geyinmiş kişiləri görmək mənə sivil bir vətəndaş kimi xoş deyil. Qaratorbalı qadınları (bəlkə də qara çarşabın altındakı kişidi. Kim bilir?) görəndə özümü əsrlərin başlanğıcında hiss edirəm.

Hər bir insan məlumatlıdır ki, məhərrəmlik deyilən ayda nələr baş verir. Konstitusiya sözünü düzgün yaza bilməyən adamlar kütləvi şəkildə məscidlərin önünə toplaşaraq şaxsey-vaxsey deyir, bədənlərini doğrayıb, boş başlarını kəsici alətlə yarırlar. Nəyə görə mən və mənim övladlarım bu vəhşiliyi görmək məcburiyyətində olmalıyıq? Bir təsəvvür edin: özlərinə fiziki xəsarət yetirən, bədənlərini “uf” demədən kəsən bu adamlar başqalarına nələr edərlər? Və bizlər bu qorxunc daşbaşlı adamlarla bir ölkədə, bir şəhərdə, bir küçədə, bir binada, bir blokda qorxa-qorxa yaşayırıq. Onları görəndə keçirdiyimiz qorxu sindromu həyatımızı alt-üst edir. Çünki o tip adamlar gözləmədiyin məqamda “allahu əkbər” qışqıraraq üstünə tullanıb sənə fiziki zərər verə bilər.

Yerigəlmişkən onu qeyd edim ki, islamda məhərrəmlik ayında özünü döymə, başyarma və sairə kimi ağılsız hərəkətlər xristianlardan keçmə bir formadır. Beləki, orta əsrlərdə Avropada yayılmış flaqelantlar hərəkatı iştirakçıları rituallar zamanı paltarsız şəhər boyu hərəkət edərək öz bədənlərinə qamçı vurub qan çıxarırdılar. Bununla doğma şəhərlərini şərəfləndirdiklərini düşünürdülər. Və onlara elə gəlirdi ki, bu vasitə ilə günahlardan, xəstəliklərdən təmizlənəcəklər.

Flaqelantların bütün mərasimləri ciddi qaydalara tabe idi: bir qadın hərəkatın üzvü ola bilməzdi; mərsimdən sonra yuyunub yataqda yatmaq olmaz(yəni, qanlı bədənlə bir neçə gün gəzməlisən); intim əlaqə qadağan edilirdi. Özünə işgəncə edərək günahlardan qurtulmanın ən yaxşı yolu olduğuna inanan flaqelantlar əslində radikal bir xristian hərəkatıdır. Onlar Məsihin döyülməsini təqlid edərək qamçı ilə özlərini döyür, bədənlərini incidirlər.

Məsələ çox ciddi və faciəvidir. Elm və texnologiya əsrində yaşamağımıza baxmayaraq, düşüncələr fəqli olmaqla yanaşı, həm də düşünülməyəcək qədər geridə qalmışdır. Ətrafımda - yəni, işdə, cəmiyyətdə tanıdığım çoxlu qırmızı diplomlu, savadlı adamlar var. Ancaq baxırsan ki, düşüncəsi sıfırın altındadır. İmam zaman quyusuna məktub yazıb atan adamlardan hansı inkişafı, tərəqqini, yeniliyi gözləyə bilərik?  Elm çox dəfələrlə mütəmadi verilən sualların cavabını verib. Ancaq insanların çoxu qətiyyən o cavabları eşitmək istəmirlər. Çünki elmi cavablar dini nağılları, inamı və xəyalları öldürür. Gec deyil. Düşüncənizi həqiqətlərə  və elmə kökləyin ki, beyninizdə gerçək arzular formalaşsın.