Milli Məclisin deputatı Zahid Oruc sərhəd və yüksək dağlıq ərazilərdə yaşayan ailələr üçün qaz və elektrik enerjisi üzrə güzəştli tariflərin tətbiqini təklif edib.
Gununesi.info-nun xəbərinə görə, deputat 2027-ci ilin dövlət büdcəsi layihəsinin müzakirəsi zamanı bildirib ki, Bakı və Abşeronun iqlim şəraiti Gədəbəy, Daşkəsən, Lerik, Şahbuz və Qusarın yüksək dağ kəndlərindəki hava şəraitindən ciddi şəkildə fərqlənir.
Onun sözlərinə görə, bəzi yaşayış məntəqələrində ailələr evlərini ildə yeddi-səkkiz ay qızdırmağa məcbur olurlar.
Buna baxmayaraq, müxtəlif iqlim şəraitində yaşayan əhali üçün eyni kommunal istehlak limitləri və tariflər tətbiq edilir.
Zahid Oruc hesab edir ki, sərt iqlim şəraitində yaşayan, xüsusilə sərhəd və yüksək dağ kəndlərində məskunlaşan ailələr üçün qaz və elektrik enerjisi üzrə istehlak limitləri ləğv edilməli, güzəştli tariflər tətbiq olunmalıdır.
Deputat həmçinin həmin yaşayış məntəqələrində çalışan müəllim və həkimlər üçün iqlim şəraiti və məsafə nəzərə alınmaqla əlavə əməkhaqqı əmsallarının müəyyənləşdirilməsini təklif edib.
O, kəndlərdə sosial infrastrukturun zəifləməsinin əhalinin şəhərlərə köçünü sürətləndirdiyini vurğulayıb.
Bildirib ki, ölkədə kənd tibb məntəqələrinin sayı 2024-cü ildəki 1603-dən 2025-ci ildə 1512-yə düşsə də, həmin müəssisələrə müraciətlərin sayı 1 milyon 263 mindən 1 milyon 414 minə yüksəlib.
Deputatın fikrincə, dövlət xidmətlərinin taleyi yalnız rentabellik prinsipi ilə müəyyənləşdirilməməlidir. Əks halda, məktəb, tibb məntəqəsi və digər xidmətlərin bağlanması kəndlərdən köçü daha da sürətləndirə bilər.
Zahid Oruc sərhəd və dağ kəndlərində məskunluğun gücləndirilməsi üçün ayrıca dövlət proqramının qəbul edilməsinin vacibliyini qeyd edib.
Elmar
Gununesi.info
The post Zahid Oruc: first appeared on Günün Səsi.
