Noyabrın 8-də Şuşa şəhərində 8 Noyabr – Zəfər Günü və Şuşa Şəhər Günü münasibətilə konsert proqramı keçirilib.

APA-nın Qarabağ bürosunun xəbərinə görə, tədbir Şuşa Şəhəri Dövlət Qoruğu İdarəsinin təşkilatçılığı və Qarabağ Universitetinin dəstəyi ilə “Şuşa” hotelində təşkil olunub.

Əvvəlcə Azərbaycan Respublikasının Dövlət Himni səsləndirilib, şəhidlərin əziz xatirəsi bir dəqiqəlik sükutla yad edilib.

Daha sonra Qarabağ Universitetinin İncəsənət fakültəsinin müəllim və tələbə heyətinin təqdimatında vətənpərvərlik ruhunda musiqi nömrələri səsləndirilib.

Konsert proqramı şəhər sakinləri tərəfindən maraqla qarşılanıb və bayram əhval-ruhiyyəsi ilə izlənilib.

Tədbirin sonunda Şuşa şəhərinin səmasında atəşfəşanlıq olub.