Dayanıqlı və Operativ Sosial Təminat (DOST) Agentliyində baş verən qalmaqallı kadr dəyişikliyi və qurumdaxili intizam araşdırması ictimaiyyətin diqqət mərkəzinə düşüb. Agentliyin İctimaiyyətlə əlaqələr və kommunikasiya departamentinin müdir müavini vəzifəsindən kənarlaşdırılan Teymur Hacıyevin yaydığı açıq məktub və bunun ardınca ortaya çıxan səbəblər ciddi müzakirələrə yol açıb.

NOCOMMENT.az xəbər verir ki, məsələ Əmək və Əhalinin Sosial Müdafiəsi Nazirliyinin tabeliyindəki qurumda baş verən daxili münaqişə ilə bağlıdır.

Məlumata görə, Teymur Hacıyevin işdən azad olunmasına rəsmi səbəb kimi qurumdaxili qaydaların pozulması və xidməti uyğunsuzluq göstərilib. Belə ki, agentlikdə aparılan daxili araşdırmalar nəticəsində onun qurumda çalışan xanım əməkdaşlardan biri ilə münasibətləri fonunda yaranmış gərginlik və şikayətlər əsas götürülüb. Tərəflər arasında yaranan anlaşılmazlıqdan sonra xanım əməkdaşın rəhbərliyə müraciət etdiyi, bundan sonra isə hər iki şəxsin işdən azad edilməsi barədə qərar qəbul olunduğu bildirilir.

İşdən çıxarılan rəsmidən sərt etiraz

Bununla belə, vəzifəsindən uzaqlaşdırılan Teymur Hacıyev qərara qəti şəkildə etiraz edib. O, Agentliyin Müşahidə Şurasının sədri, əmək və əhalinin sosial müdafiəsi naziri Anar Əliyevə ünvanladığı açıq məktubda barəsində aparılan xidməti araşdırmanın nəticələri ilə razılaşmadığını bəyan edib.

T.Hacıyev qeyd edib ki, irəli sürülən ittihamlar araşdırma zamanı tam təsdiqini tapmayıb və onun töhmətlə, işəgötürənin təşəbbüsü ilə işdən çıxarılması üçün kifayət qədər hüquqi əsas mövcud deyil. O, noyabrın 4-də və 5-də öz ərizəsi ilə işdən ayrılması üçün ona təzyiqlər edildiyini də iddia edib.

Açıq məktubda ailə və sosial vəziyyətinə də toxunan sabiq departament müdirinin müavini iki övlad atası olduğunu, uşaqlarından birinin sağlamlıq imkanlarının məhdudluğu səbəbindən xüsusi qayğıya, reabilitasiya və daimi dəstəyə ehtiyac duyduğunu vurğulayıb. O, işini itirməsinin ailəsinin maddi rifahını və övladının müalicə imkanlarını ağırlaşdıracağını bildirərək əmək münasibətlərini davam etdirmək istədiyini qeyd edib.

Hazırda tərəflər arasında yaranmış bu qurumdaxili mübahisə və səsləndirilən iddialarla bağlı rəsmi qurumların yekun mövqeyi izlənilir.

Əli Səfərli,
NOCOMMENT.az