Azərbaycan dövləti hər zaman Vətən uğrunda döyüşmüş qazilərimizə və onların ailə üzvlərinə yüksək diqqət və qayğı göstərir.
Lakin bəzən qurumların daxilindəki ayrı-ayrı məmurların bürokratik yanaşması və səhlənkarlığı vətəndaşların haqlı narazılığına yol açır. Xüsusilə təhsil alan, gələcəyin mütəxəssisi olan qazi övladlarının qanuni hüquqlarının təmin edilməsində yaranan süni ləngimələr təəssüf doğurur.
NOCOMMENT.az xəbər verir ki, redaksiyamıza müraciət edən Birinci Qarabağ müharibəsi qazisinin övladı, Azərbaycan Arxeologiya, Memarlıq və İnşaat Universitetinin (AZMİU) 2-ci kurs əyani magistratura tələbəsi Cavidan Yaşar oğlu Mikayılov aylardır Dövlət Sosial Müdafiə Fondu (DSMF) tərəfindən ailə başçısını itirməyə görə düşən pensiya ödənişini ala bilmədiyini bildirib.
Tələbənin sözlərinə görə, mərhum atası Yaşar Dilən oğlu Mikayılov Birinci Qarabağ müharibəsində yaralanaraq üçüncü dərəcəli əlil statusu alıb (Salyan rayonu DSMM tərəfindən verilən № 007747 nömrəli vəsiqə) və 2004-cü ildən dünyasını dəyişib. Həmin vaxtdan etibarən ailə başçısını itirməyə görə pensiya alan Cavidan Mikayılov qanunvericiliyin tələbinə əsasən, əyani təhsil aldığım müddətdə – 23 yaşı tamam olana qədər (20 fevral 2027-ci tarixədək) bu hüquqdan yararlanmalıdır. Lakin heç bir tutarlı səbəb göstərilmədən ödənişlər dayandırılıb.
Problemin təfərrüatlarını bölüşən şikayətçi qeyd edib ki, iyul ayında pensiyası kəsilib, sonradan çətinliklə də olsa bərpa edilib və iki ayın pulu bir yerdə ödənilib. Lakin təhsil müddəti davam etməsinə baxmayaraq, avqust ayından etibarən ödənişlər yenidən dayandırılıb. Sentyabr və oktyabr ayları ərzində tələb olunan bütün təhsil arayışları və sənədlər elektron qaydada təqdim olunmasına, "Mygov" sistemində əyani oxuduğu açıq görünməsinə rəğmən, qurum tərəfindən məsələ hələ də həllini tapmayıb. Oktyabrın 21-də DSMF-nin Xüsusi Şərtlərlə Təyinat üzrə Mərkəzi Filialında qəbulda olarkən ona ay sonuna qədər ödənişin olunacağı söz verilsə də, vəd yerinə yetirilməyib, yeni müraciətlərə isə cavab verilmir.
Cavidan Mikayılov müraciətində haqlı narahatlığını belə ifadə edib: "Mən hazırda 22 yaşındayam və əyani magistraturada təhsil alıram. Qanunun tələbinə əsasən, 23 yaşım tamam olana qədər bu hüququm var. Sənədlərimi qaydasında təqdim etməyimə baxmayaraq, artıq iki aydır ödəniş edilmir və heç bir tutarlı səbəb göstərilmir. Müraciətlərimizə cavab verilmədiyi üçün haqqımı hüquqi müstəvidə qorumaqda çətinlik çəkirəm. Atası bu torpaqlar üçün canını qoymuş bir qazinin övladına qarşı bu cür yanaşmanın edilməsini istəmirik. Xahiş edirik ki, məsələmizin araşdırılmasına və pensiyamızın bərpa olunmasına köməklik göstərin".
NOCOMMENT.az olaraq məsələni diqqətdə saxlayırıq. Məsələ ilə bağlı Əmək və Əhalinin Sosial Müdafiəsi Nazirliyinə sorğu ünvanlamışıq.
