Türkiyədə müxalif Yeni Partiyanın sədri Özgür Özəl Azərbaycana səfər etmək istəyir. Partiyanın xarici siyasət koordinatoru İlhan Üzgəl Modern.az-a geniş müsahibəsində bu niyyəti açıqlayıb. Onun sözlərinə görə, Özgür Özəl 2024, 2025 və 2026-cı illərdə Zəfər Günü münasibətilə Azərbaycan Prezidenti İlham Əliyevlə telefon danışıqları aparıb. "Bizim üçün Azərbaycanla münasibətlər partiyalarüstü, strateji və uzunmüddətli dövlət siyasətidir", - deyə partiya nümayəndəsi vurğulayıb.
Üzgəl deyib ki, Azərbaycanla siyasi təmaslarımızı və qarşılıqlı səfərlərimizi inkişaf etdirmək istəyirik: "Partiyamızın sədrinin Azərbaycana səfər etməsindən də böyük məmnunluq duyarıq.
Lakin hələlik səfərlə bağlı dəqiq tarix açıqlamırıq. Əsas müxalifət partiyası olaraq Türkiyə-Azərbaycan münasibətlərinin gücləndirilməsinə hər cür konstruktiv töhfə verməyə hazırıq. Bu yanaşmamızı cənab Əliyevə də çatdırmışıq".
Bu arada, Türkiyənin hakim Ədalət və İnkişaf Partiyası (AKP) parlament və prezident seçkilərinin 2028-ci ildən daha erkən - 2027-ci ilin mayında keçirilməsi imkanını müzakirə edir.
Türkiyənin "Cümhuriyyət” qəzetinin yazdığına görə, seçkilərin vaxtının erkən tarixə çəkilməsi ilə bağlı partiya daxilində müxtəlif variantlar nəzərdən keçirilir. Bəzi AKP nümayəndələri isə siyasi və iqtisadi vəziyyəti nəzərə alaraq 2027-ci ilin noyabrını daha real hesab edirlər.
Belə bir siyasi şəraitdə Özgür Özəlin Azərbaycana səfər niyyəti hansı məqsədi güdür və hədəf nələrdir?
Deputat Bəhruz Məhərrəmov Musavat.com-a bildirib ki, Özgür Özəlin Azərbaycana səfər etmək niyyəti həm strateji müttəfiqliyin institusional davamlılığı, həm də Türkiyənin demokratik siyasi sistemindəki təbii rəqabət dinamikası baxımından diqqət çəkir:
“Belə bir şəraitdə müxalifət düşərgəsinin həm təşkilati, həm xarici siyasət baxımından fəallığını artırması siyasi proseslərin təbii tərkib hissəsidir. Türkiyə-Azərbaycan münasibətləri kontekstində isə bu səfər niyyəti iki qardaş ölkə arasındakı əlaqələrin daxili siyasi konyukturadan asılı olmadığını bir daha təsdiqləyir. Müxalifət partiyasının xarici siyasət koordinatoru İlhan Üzgəlin müsahibəsində bu münasibətləri "partiyalarüstü, strateji və uzunmüddətli dövlət siyasəti" kimi səciyyələndirməsi və Özgür Özəlin Zəfər Günü münasibətilə Azərbaycan Prezidenti İlham Əliyevə zəng etməsi Türkiyədə əsas siyasi qüvvələrin Bakı ilə müttəfiqlik xəttinə vahid mövqedən yanaşdığını göstərir. Bu yanaşma iki ölkə arasındakı münasibətlərin sarsılmazlığını və Şuşa Bəyannaməsi ilə müəyyən edilmiş strateji tərəfdaşlığın Türkiyə cəmiyyətinin və siyasi spektrinin bütün təbəqələri tərəfindən dəstəkləndiyini nümayiş etdirir”.
Deputatın fikrincə, səfər təşəbbüsünün arxasında duran əsas hədəflər dövlətlərarası münasibətlərdə konstruktiv dialoqun genişləndirilməsinə yönəlib: “Bir tərəfdən, müxalifət lideri Türkiyənin əsas xarici siyasət prioriteti olan Azərbaycanla birbaşa təmaslar qurmaqla regional proseslər və ikitərəfli əməkdaşlıq gündəliyi barədə birbaşa məlumat mübadiləsi aparmağı hədəfləyir, digər tərəfdən, Türkiyə seçicisi üçün xarici siyasətdə Azərbaycanla həmrəylik və Türk dünyası ilə inteqrasiya dövlətçilik ənənələrinə sadiqliyin əsas göstəricisi hesab olunur və bu baxımdan Bakı ilə dialoq həm də Türkiyə daxilində milli həssasiyyətlərə hörmətin ifadəsi kimi çıxış edir. Rəsmi Bakı isə beynəlxalq hüquq və mehriban qonşuluq, eləcə də qardaşlıq prinsiplərinə uyğun olaraq, Türkiyənin daxili siyasi proseslərinə neytral yanaşmaqla yanaşı, iki ölkə arasındakı müttəfiqlik münasibətlərinin möhkəmlənməsinə töhfə vermək istəyən bütün qanuni siyasi institutlarla açıq və konstruktiv dialoq ənənəsini qoruyur”.