Astronomlar ilk dəfə olaraq ömrünün sonuna yaxınlaşan nəhəng bir ulduzun öz orbitindəki kiçik yoldaşını udmasını birbaşa müşahidə ediblər.
“Qafqazinfo” xəbər verir ki, “Nature” jurnalında dərc olunan araşdırmaya görə, bu nadir kosmik hadisə Andromeda qalaktikasının kənarında, Yerdən təxminən 2,5 milyon işıq ili məsafədə qeydə alınıb.
Kolumbiya Universitetinin tədqiqatçısı Viraj Karambelkarın rəhbərlik etdiyi qrup müəyyən edib ki, kütləsi Günəşdən 7 dəfə böyük olan nəhəng ulduz yanacağını tükədərək şişib və diametri Günəşinkindən 350 dəfə böyük həddə çatıb. Bu genişlənmə zamanı yaxınlıqdakı kiçik ulduz onun təsir dairəsinə düşüb və 7 il ərzində spiralvari hərəkətlə nəhəngin nüvəsinə doğru çəkilib. 2025-ci ilin sonlarında baş verən birləşmə nəticəsində Günəşdən milyon dəfə parlaq partlayış yaranıb.
NASA-nın NEOWISE və “James Webb” kosmik teleskopları ilə izlənən bu hadisə ömrünü başa vurmaqda olan nəhəng ulduzun “cavanlaşmasına” səbəb ola bilər. Avtomatik olaraq “AT2025abao” kodu verilən səma cisminə alimlər xarici görünüşünə görə məşhur Çin buxar çörəyinin şərəfinə “Bao” ləqəbini veriblər.