"Mənzil İnşaatı Dövlət Agentliyinin (MİDA) dekabrın 16-da satışa çıxaracağı 1 049 mənzillə bağlı elan ciddi suallar doğurur. Bakıda satışa çıxarılan mənzillərin qiymətlərinin əvvəlki illərlə müqayisədə xeyli artması, Hövsan və Binəqədi yaşayış komplekslərində isə yalnız şəxsi vəsait hesabına satışın nəzərdə tutulması qəbuledilməzdir."
NOCOMMENT.az xəbər verir ki, bu sözləri tanınmış vəkil Aslan İsmayılov deyib. Onun sözlərinə görə, əvvəlki satışlarda nağd ödənişə tətbiq edilən 10 faizlik güzəştin bu dəfə elanda qeyd olunmaması diqqət çəkir və bu yanaşma güzəştli mənzil layihələrinin sosial mahiyyəti ilə qətiyyən uzlaşmır: "Axı güzəştli mənzillər mənzilə ehtiyacı olan vətəndaşlar üçün nəzərdə tutulub. Bəs 100 min manat və daha çox vəsaiti olmayan vətəndaş bu imkandan necə yararlansın? Belə məbləğdə pulu olan şəxs həmin vəsaitlə Masazır, Binəqədi və digər ərazilərdə daha ucuz mənzil ala bilər."
Hüquqşünas qeyd edib ki, əksər vətəndaşlar üçün mənzil almağın əsas yolu ipoteka kreditidir və Bakıda mənzillərin yalnız nağd vəsaitlə satılması bu imkanları yalnız maddi imkanı yüksək olanlarla məhdudlaşdırır: "MİDA mənzillərin əvvəlki kimi ipoteka mexanizmi ilə alınmasına şərait yaratmalı, qiymət və güzəştlər siyasətinə yenidən baxmalıdır. Güzəştli mənzil imkanı 100 min manat və daha çox nağd pulu olanların imtiyazına çevrilməməlidir."
Aslan İsmayılov əlavə edib ki, mövcud problemlər təkcə bundan ibarət deyil: "Həmçinin bu gün saat 15:00-da adi ipoteka limitləri üçün müraciət qəbulu başlamışdır. Lakin sistemdə ilk saniyələrdən limitlər dolmuş və sistemdə ciddi donmalar olmuşdur."
Əli,
NOCOMMENT.az
