ABŞ-nin Nyu-York şəhərində yaşlı bir qadının mənzilində aparılan təmizlik zamanı şkafın dərinliyində gizlədilmiş taxta qutudan məşhur amerikalı rəssam Corciya O'Kiffin itirilmiş əsəri tapılıb.
“Qafqazinfo” xəbər verir ki, sənət dünyasında böyük əks-səda doğuran əsərin dəyərinin təxminən 3 milyon dollar olduğu müəyyən edilib.
Manhettendə xalasının əşyalarını səliqəyə salan Betsi adlı qadın xəz paltoların arxasında gizlədilmiş taxta qutu aşkar edib. Məlum olub ki, rəsm əsəri 1960-cı illərdə məzuniyyət hədiyyəsi olaraq mənzil sahibinə verilib və uzun müddət divardan asılı vəziyyətdə qalıb. Lakin 1980-ci illərdə qonaqlardan birinin tabloya həddindən artıq maraq göstərməsi ev sahibini qorxuya salıb. Nəticədə rəsm əsəri orijinal qutusuna qoyularaq təxminən 40 il şkafda nəzərdən uzaq saxlanılıb.
İncəsənət mütəxəssislərinin apardığı araşdırmalar nəticəsində tablonun rəssamın 1930-cu ildə çəkdiyi və Nyu-Meksikodakı Lobo zirvəsini təsvir edən “Abiquiu yaxınlığında, Nyu-Meksiko I” adlı əsəri olduğu rəsmən təsdiqlənib.
Arxiv sənədlərinə görə, əsər 1963-cü ildə 3800 dollara alınıb. İllər sonra üzə çıxan qiymətli sənət əsəri 17 noyabr 2026-cı il tarixində Nyu-Yorkun məşhur “Christie's” hərrac evi tərəfindən satışa çıxarılacaq. Məlumata əsasən, əsərin yenidən kəşf edilməsindən qısa müddət sonra ona sahib olan yaşlı qadın 98 yaşında dünyasını dəyişib.
