“Elite” serialındakı rolu ilə dünya miqyasında şöhrət qazanan, ulduz futbolçu Kilian Mbappe ilə münasibəti ilə gündəmdə olan məşhur ispan aktrisa Ester Eksposito gənclik illərində yaşadığı ağır psixoloji böhranla bağlı təəccüblü açıqlamalar verib.
“Qafqazinfo” xəbər verir ki, 26 yaşlı aktrisa hələ 19 yaşı olarkən evtanaziya üçün müraciət etdiyini, lakin tələbinin rədd olunduğunu bildirib.
Gənclik illərində dərin depressiya və ruhi sağlamlıq problemi yaşadığını qeyd edən Eksposito həmin dövrü belə xatırlayıb: “19 yaşımda evtanaziya istədim. İçimdə yaşadığım ruhsal və psixoloji problemlər məni iki il ərzində tamamilə təsir altına aldı. Həyatdan heç bir şəkildə zövq almır, evdən bayıra çıxmırdım. Ailəmin bütün etirazlarına baxmayaraq bu müraciəti etdim, lakin tələbim qəbul edilmədi”.
Aktrisa həmin çətin dövrdə həyatına son qoymağa da cəhd göstərdiyini, lakin sağ qaldığını etiraf edib.
Zamanla vəziyyətinin dəyişdiyini vurğulayan məşhur ulduz 21-22 yaşlarından etibarən hisslərinin müsbət istiqamətdə transformasiya olduğunu qeyd edib: “21-22 yaşıma çatanda bu duyğu tədricən dəyişməyə başladı. Bu gün 26 yaşım var və əminliklə deyə bilərəm ki, həyatım yaxşılaşır”.
