Liviyanın Benqazi şəhərindəki hərbi-dəniz bazasında Rusiyaya məxsus “Merkury” korvetində pilotsuz aparat hücumu nəticəsində partlayış baş verib.
APA xəbər verir ki, Liviyanın şərqindəki hökumətin ilkin araşdırmasına görə, gəmi pilotsuz katerlərin hücumuna məruz qalıb.
Hadisə nəticəsində 10 nəfər – Rusiya və Liviya vətəndaşları yüngül xəsarət alıb. Peyk görüntülərinə əsasən, korvetin böyük hissəsi çevrilərək suya qərq olub.
Bundan başqa, Benqazi sahillərində Malta bayrağı altında üzən ticarət gəmisi də pilotsuz katerlə vurulub. Liviya Hərbi Dəniz Qüvvələri gəminin heyətini xilas edib. Məlumata görə, həmin gün axşam saatlarında Liviya hərbi-dəniz və hava qüvvələri Benqazi sahillərində 20-dən çox pilotsuz kateri ələ keçirib və ya zərərsizləşdirib.
Liviyanın şərqindəki hökumət hücumu ölkənin suverenliyinin pozulması və dəniz təhlükəsizliyinə təhdid kimi qiymətləndirib. Hadisə ilə bağlı Rusiya ilə birgə araşdırma başladılıb. Hücumların məsuliyyətini heç kim üzərinə götürməyib.