ABŞ Prezidenti Donald Trampın xüsusi nümayəndəsi və kürəkəni Cared Kuşner Ukraynada münaqişənin nizamlanması istiqamətində əhəmiyyətli irəliləyiş əldə olunduğunu bildirib.

APA xəbər verir ki, Kuşner bu barədə “X” sosial şəbəkəsində paylaşım edib.

“Son bir il ərzində Ukrayna və avropalı tərəfdaşlarımızla sıx əməkdaşlıq edərək üç əsas istiqamət üzrə bu baxışın həyata keçirilməsində ciddi irəliləyiş əldə etmişik”, – o qeyd edib.

ABŞ Prezidentinin xüsusi nümayəndəsinin sözlərinə görə, birinci istiqamət Ukrayna üçün güclü və etibarlı təhlükəsizlik zəmanətlərinin təmin edilməsini nəzərdə tutur.

İkinci istiqamət Ukraynanın Avropa İttifaqına üzvlüyünə aparan yolun müəyyənləşdirilməsidir.

Üçüncü istiqamət isə Avropa tərəfdaşları, Dünya Bankı və digər ölkələrlə birgə hazırlanmış hərtərəfli bərpa planının həyata keçirilməsini əhatə edir.

Kuşner bu üç istiqamətin Ukraynada uzunmüddətli nizamlanmanın əsasını təşkil etdiyini bildirib.