Azərbaycanın hüquq-mühafizə orqanlarının beynəlxalq axtarışa verdiyi daha bir şəxs xarici ölkədə saxlanılaraq ölkəyə gətirilib. Xüsusilə külli miqdarda vergidən, eləcə də sosial sığorta və digər məcburi ödənişlərdən yayınmaqda şübhəli bilinən Azərbaycan vətəndaşı Telman Allahverdiyevin Gürcüstandan Azərbaycana ekstradisiyası həyata keçirilib.
NOCOMMENT.az xəbər verir ki, Telman Musa oğlu Allahverdiyevin ekstradisiyası ilə bağlı Azərbaycan tərəfinin vəsatəti Gürcüstanın Ədliyyə Nazirliyi tərəfindən təmin edilib.
Ekstradisiya 22 yanvar 1993-cü il tarixli «Mülki, ailə və cinayət işləri üzrə hüquqi yardım və hüquqi münasibətlər haqqında» Konvensiyanın, eləcə də 13 dekabr 1957-ci il tarixli «Ekstradisiya haqqında» Avropa Konvensiyasının tələblərinə uyğun həyata keçirilib.
Baş Peokurorluqdan verilən məlumata əsasən, Telman Allahverdiyev barəsində Azərbaycan Respublikası İqtisadiyyat Nazirliyi yanında Dövlət Vergi Xidmətinin Vergi cinayətlərinin İbtidai Araşdırılması Baş İdarəsinin İstintaq və Təhqiqat idarəsində araşdırılan cinayət işi üzrə təqsirləndirilən şəxs qismində cəlb etmə haqqında qərar qəbul edilib.
O, xüsusilə külli miqdarda vergiləri, işsizlikdən sığorta, icbari tibbi sığorta və məcburi dövlət sosial sığorta haqlarını ödəməkdən yayınmaqda şübhəli bilinir.
İstintaqdan yayınaraq gizləndiyinə görə beynəlxalq axtarışa verilən Telman Allahverdiyev Gürcüstan ərazisində müəyyən edilərək saxlanılıb. Daha sonra Gürcüstanın Ədliyyə Nazirliyinin aidiyyəti qurumları tərəfindən Azərbaycan tərəfinə təhvil verilib.
Beləliklə, beynəlxalq hüquqi əməkdaşlıq çərçivəsində həyata keçirilən əməliyyat nəticəsində axtarışda olan şəxs Azərbaycana qaytarılıb. Hazırda cinayət işi üzrə istintaq tədbirləri davam etdirilir.
Qeyd edək ki, Telman Allahverdiyevin təqsiri məhkəmənin qanuni qüvvəyə minmiş hökmü ilə sübuta yetirilməyib və o, təqsirsizlik prezumpsiyasına uyğun olaraq günahsız hesab olunur.\\musavat.com
