“Walt Disney Co.” kinostudiyası məşhur “Evdə tək” franşizasının yeni filmində baş rol üçün aktyor Makoley Kalkini geri qaytarmağı planlaşdırır.
“Qafqazinfo” xəbər verir ki, bu barədə “Variety” jurnalı etibarlı mənbələrə istinadən məlumat yayıb.
Bildirilib ki, layihə üzərində işlər hazırda ilkin mərhələdədir.
Yeni filmin ssenarisi komediya janrındakı işləri ilə tanınan Set Rogen və Evan Qoldberqə həvalə olunub. Filmin süjet xətti və tam aktyor heyəti ilə bağlı təfərrüat isə hələlik gizli saxlanılır.
Xatırladaq ki, “Evdə tək” (1990) və “Evdə tək 2: Nyu-Yorkda itmiş” (1992) filmlərində evini iki oğrudan qeyri-adi tələlərlə qoruyan balaca “Kevin Makkallister” obrazı Makoley Kalkinə dünya şöhrəti qazandırmışdı. Sonrakı illərdə rejissor Kris Kolumbus və Kalkinin iştirakı olmadan çəkilən davam filmləri isə əvvəlki uğuru təkrarlaya bilməmişdi.
Qeyd edək ki, aktyor özü də 2025-ci ilin noyabrında verdiyi müsahibədə “Kevin Makkallister” roluna qayıtmağı istisna etmədiyini və mümkün davam filmi ilə bağlı maraqlı ideyalarının olduğunu açıqlamışdı.