İsrail Müdafiə Qüvvələri (IDF) və ölkənin Daxili Təhlükəsizlik Xidməti (Şin Bet) Qəzza zolağının cənubundakı Xan Yunis şəhərində yerləşən Nasser xəstəxana kompleksinə gecə saatlarında endirilən aviazərbənin HAMAS-ın Xan Yunis briqadasının komandiri Məhəmməd Əbu İsmaili hədəf aldığını təsdiqləyib.
“The Times of Israel” nəşrinin məlumatına görə, İsrail tərəfinin birgə bəyanatında zərbənin Əbu İsmail və xəstəxanada gizləndiyi bildirilən digər HAMAS üzvlərinə qarşı həyata keçirildiyi qeyd olunub.
Bəyanatda Məhəmməd Əbu İsmailin briqadanın fəaliyyətinə rəhbərlik etdiyi, İsrail hərbçilərinə və mülki şəxslərə qarşı hücum planlarının hazırlanması və həyata keçirilməsində iştirak etdiyi iddia olunur. İsrail tərəfi onun müharibə dövründə bir sıra girovların saxlanılmasına da məsul olduğunu bildirib.
Bununla belə, İsrail ordusu və Şin Bet zərbənin nəticələrinin araşdırıldığını, Əbu İsmailin taleyinin hələlik məlum olmadığını açıqlayıb.
