İsveçrə hakimiyyəti silahlı münaqişələrdə iştirak edən ölkələrə silah ixracına tətbiq olunan məhdudiyyətləri yumşaltmağı planlaşdırır.
APA xəbər verir ki, bu barədə İsveçrə Dövlət İqtisadiyyat Katibliyinin (SECO) rəsmi nümayəndəsi Fransuaz Şants bildirib.
Onun sözlərinə görə, noyabrın 29-da keçiriləcək referendumda parlamentin daha əvvəl qəbul etdiyi “Hərbi materiallar haqqında” qanuna dəyişikliklərin təsdiqlənməsi gözlənilir.
Dəyişikliklər İsveçrəyə tərəfdaş hesab edilən 36 ölkəyə, hətta həmin dövlətlər silahlı münaqişələrdə iştirak etdikləri halda belə, müəyyən hərbi məhsulların ixracına icazə vermək imkanı yaradacaq.
Şants bildirib ki, söhbət İsveçrə ilə oxşar ixrac nəzarəti sistemlərinə malik ölkələrdən gedir.
O vurğulayıb ki, ixracına icazə verilməsi nəzərdə tutulan hərbi məhsullar münaqişədə iştirak edən tərəfə hərbi üstünlük qazandırmamalıdır.
Qeyd edək ki, İsveçrənin mövcud qanunvericiliyi neytrallıq siyasəti çərçivəsində silahlı münaqişələrdə iştirak edən ölkələrə silah ixracını məhdudlaşdırır.
