İrlandiyanın paytaxtı Dublində Volodimir Zelenski ilə ABŞ Prezidenti Donald Trampın xüsusi nümayəndəsi Stiv Uitkoff və Trampın kürəkəni Cared Kuşner arasında görüş keçirilib.
“Qafqazinfo” xəbər verir ki, görüşdən sonra jurnalistlərə açıqlama verən Ukrayna lideri aparılan danışıqların müharibəyə son qoyacağına dair ümid verdiyini vurğulayıb.
O, həmçinin Rusiya ilə genişmiqyaslı əsir mübadiləsinin baş tutacağını təsdiqləyərək bunun prosesin gedişində mühüm addım olacağını qeyd edib.
O, bunun Rusiya ilə indiyədək baş tutan ən böyük əsir mübadiləsi olacağını açıqlayıb.
Zelenski növbəti mərhələdə Avropa ölkələrinin də danışıqlar masasında yer alacağını bildirib və hər bir görüşün konkret nəticə verməli olduğunu deyib. Cared Kuşner də Avropanın prosesdəki roluna diqqət çəkərək razılaşmanın yekunlaşdırılması üçün avropalıların iştirakının vacibliyini qeyd edib:
“Avropalılar masada olmadan bu razılaşmanı yekunlaşdıra bilmərik. Biz Rusiya Prezidenti Vladimir Putinə də bunun çox vacib olduğunu çatdırırıq”.
Qeyd edək ki, ABŞ-nin xüsusi nümayəndəsi Stiv Uitkoff Dublin səfərindən əvvəl Moskvada Rusiya Prezidenti Vladimir Putinlə görüşüb və həmin təmaslar zamanı müəyyən irəliləyişin əldə edildiyini açıqlayıb.
