Son illər sosial şəbəkə fenomenləri cəmiyyətin diqqətini çəkən mövzulardan birinə çevrilib. İstər Azərbaycanda, istərsə də dünyanın bir çox ölkəsində, o cümlədən qardaş Türkiyədə fenomenlərin həyatı, yaşayış tərzi, qazancı və gündəlik fəaliyyəti insanlarda maraq doğurur. Onların paylaşdıqları görüntülər, göstərdikləri həyat tərzi, getdikləri məkanlar və şəxsi münasibətləri sosial şəbəkə istifadəçilərinin diqqətini çəkir.
Artıq insanlar fenomenləri yalnız paylaşdıqlarına yox, onların kiminlə münasibətdə olması, evlənməsi, boşanması, hansı ölkəyə səyahət etməsi, nə alması və gündəlik həyatında baş verənlər də izləyiciləri maraqlandırır. Bəzən bir fenomenin şəxsi həyatında baş verən kiçik bir dəyişiklik belə sosial şəbəkələrdə geniş müzakirələrə səbəb oluraq ajotaj yaradır.
Maraqlısı da budur ki, fenomenlərə maraq yalnız boş vaxtı çox olan insanlar tərəfindən deyil. Elə gün ərzində gərgin iş qrafiki olan insanlar da vaxt tapıb onların paylaşımlarını diqqətlə izləyirlər. Bu da fenomenlərin həyatının artıq sadəcə əyləncə mövzusu olmadığını, gündəlik həyatın bir hissəsinə çevrildiyini göstərir.
Bəs insanları fenomenlərin həyatına bu qədər bağlayan nədir?
Əsas səbəblərdən biri onların göstərdiyi dəbdəbəli həyat, səyahətləri, geyimləri və gündəlik məşğuliyyətlərdir. Bu da insanlarda maraqla yanaşı, müqayisə hissi də yaradır. İnsanlar öz həyatlarını fenomenlərin həyatı ilə müqayisə edir. Bəzən fenomenlərin həyatını izləmək sanki bir serial kimi izlənilir. Amma bəziləri isə sadəcə fərqli yaşam tərzini izləməkdən zövq alır.
Digər tərəfdən, sosial şəbəkələr fenomenlərlə izləyicilər arasında yaxınlıq hissi yaradır. İnsanlar onları hər gün izlədikləri üçün sanki yaxından tanıyırlar. Onların həyatında baş verənləri özlərinə yaxın hesab edirlər. Buna görə də həmin şəxslərin şəxsi həyatında baş verən hadisələrə biganə qalmırlar.
Beləliklə, fenomenlərə maraq yalnız onların paylaşdıqları görüntülərlə məhdudlaşmır. Bu marağın arxasında psixoloji amillər, fərqli həyat tərzini görmək istəyi, özünü başqaları ilə müqayisə etmək və insanların gündəlik maraqları dayanır.
Sosioloqlar deyir ki, fenomenlərə marağın artması insanların fərqli həyat tərzlərinə olan marağın göstəricisidir. İnsanlar bəzən öz gündəlik həyatlarında görə bilmədikləri dəbdəbəni, səyahətləri və qaynar münasibətləri sosial şəbəkələr vasitəsilə izləyir, sanki özlərində baş vermiş hal kimi hiss edirlər. Bu maraq bir tərəfdən əyləncə xarakteri daşıyır, digər tərəfdən isə insanlarda müqayisə, təqlid və fərqli həyat yaşamaq istəyi yarada bilər.
Nəticə etibarilə, sosial şəbəkə fenomenlərinə maraq insanların yalnız başqalarının həyatını izləmək istəyindən qaynaqlanmır. Bu maraq bəzən öz həyatından fərqli bir həyat görmək, bəzən də özünü başqaları ilə müqayisə etmək istəyindən də yarana bilir.
Ancaq unutmamaq lazımdır ki, sosial şəbəkələrdə nümayiş olunan həyat hər zaman gerçəkliyi əks etdirmir. İzləyicilər çox vaxt yalnız onlara göstərilən görüntüləri görürlər. Bu görüntülərin arxasında nələrin baş verdiyini isə bilmirlər. Bəlkə də fenomenlərə olan marağın əsas səbəblərindən biri də insanların görmək istədikləri bir həyatdır.
Şəbnəm Rəhimova
The post Fenomenlərə maraq: first appeared on Günün Səsi.
