Türkiyə Prezidenti Rəcəb Tayyib Ərdoğan sentyabrın 17-dən ölkə gündəminə daxil olan və maliyyə bazarlarında geniş müzakirələrə səbəb olan fond məsələsi ilə bağlı növbəti açıqlama verib.
Gununesi.info Türkiyə mediasına istinadən xəbər verir ki, Ərdoğan Nazirlər Kabinetinin iclasından sonra keçirilən mətbuat konfransında məsələnin hökumətin nəzarətində olduğunu və müəyyən edilmiş yol xəritəsi əsasında həll edildiyini bildirib.
“Fond məsələsini açıqladığımız yol xəritəsi çərçivəsində addım-addım həll yoluna qoyuruq. Aidiyyəti nazirlərimiz və qurumlarımız zəruri açıqlamaları mütəmadi şəkildə verirlər. Biz də məsələni çox ciddi şəkildə izləyirik. İnşallah, bu məsələdə ən kiçik güzəştə və səhlənkarlığa yol verilməyəcək”, – deyə Türkiyə Prezidenti vurğulayıb.
Prosesə Cevdet Yılmaz rəhbərlik edir
Xatırladaq ki, fond məsələsi ilə bağlı ilk ciddi addımlar sentyabrın 17-də atılıb. Həmin gün Türkiyənin Xəzinə və Maliyyə naziri Mehmet Şimşekin iştirakı ilə Maliyyə Sabitliyi Komitəsi toplanıb və yaranmış vəziyyət müzakirə olunub.
Sentyabrın 29-da isə Ərdoğanın rəhbərliyi ilə iqtisadiyyatın əsas fiqurlarının və aidiyyəti qurumların iştirakı ilə koordinasiya toplantısı keçirilib. Həmin toplantıda fondların ləğvi və investorların hüquqlarının qorunması prosesini əlaqələndirmək məqsədilə vitse-prezident Cevdet Yılmazın rəhbərliyi altında tam səlahiyyətli Fond Koordinasiya Şurasının yaradılması qərara alınıb.
Bundan əlavə, Prezidentin tapşırığı ilə Dövlət Nəzarət Şurası (DDK) kapital bazarlarında baş verən investisiya fondu əməliyyatları ilə bağlı araşdırma və yoxlamalara başlayıb.
Noyabrın 5-də Cənubi Koreya səfərindən qayıdarkən jurnalistlərin suallarını cavablandıran Ərdoğan fond əməliyyatlarında rüşvət, qanunsuzluq və sui-istifadə hallarının araşdırıldığını, gözlənilməz şəxslərin də bu prosesə cəlb olunduğunun üzə çıxdığını bildirmişdi.
Prezident həmçinin fondların ləğvi çərçivəsində investorlar qarşısında öhdəliklərin yerinə yetirilməsi üçün ödənişlərin başladığını açıqlamışdı.
Ərdoğanın son açıqlaması isə hökumətin fond məsələsinin həlli istiqamətində müəyyən etdiyi yol xəritəsini davam etdirdiyini və prosesə nəzarətin saxlanıldığını göstərir.
The post Ərdoğan fond məsələsi ilə bağlı: first appeared on Günün Səsi.
