Dünyanın ən aqressiv və ölümcül onkoloji xəstəliklərindən biri sayılan mədəaltı vəzi xərçənginin müalicəsində ümidverici elmi nəticə əldə olunub.

“Qafqazinfo” BBC-yə istinadən xəbər verir ki, kimyaterapiya ilə birlikdə qəbul edilən gündəlik “daraxonrasib” həbi klinik sınaqların ilkin mərhələsində xəstələrin 90 faizində şişlərin böyüməsini dayandırıb, bəzi pasiyentlərdə isə xərçəng izləri müayinələrdə tamamilə görünməz hala gəlib.

1 və 2-ci faza klinik sınaqları çərçivəsində xəstəliyi orqanizmin digər hissələrinə yayılmış 61 pasiyentə kimyaterapiya ilə paralel olaraq gündəlik “daraxonrasib” həbi verilib. Əldə olunan nəticələrə əsasən, pasiyentlərin 90 faizində şişlərin inkişafı dayanıb, 60 faizdən bir qədər çoxunda isə şişlər kiçilib və ya yox olub.

Tədqiqatın ən diqqətçəkən məqamı isə xəstələrin təxminən 8 faizində (hər 12 nəfərdən birində) kompüter tomoqrafiyası (KT) müayinələri zamanı xərçəng hüceyrələrinin artıq aşkar edilməməsi olub.

“Daraxonrasib” xərçəng hüceyrələrinin nəzarətsiz çoxalmasına təkan verən RAS zülallarını hədəfə alır. Mədəaltı vəzi xərçənginin əksər növlərində müşahidə olunan KRAS mutasiyalarının qarşısını alan bu mexanizmin gələcəkdə oxşar genetik mutasiyalara malik ağciyər və yumurtalıq xərçənglərinin müalicəsində də tətbiq ediləcəyi ehtimal olunur.

Böyük Britaniyanın “Cancer Research UK” təşkilatının nümayəndəsi doktor Sem Qodfri bu nəticələri son illərdə mədəaltı vəzi xərçəngi sahəsində əldə edilən ən əhəmiyyətli irəliləyiş adlandırıb. Tədqiqatda iştirak edən “Memorial Sloan Kettering” Xərçəng Mərkəzinin mütəxəssisi doktor Vunqki Park isə müalicəyə verilən reaksiyanın həm sürət, həm də təsir dərinliyi baxımından ümidverici olduğunu və xəstələrin ömür müddətini uzada biləcəyini qeyd edib.

Ümidverici göstəricilərə baxmayaraq, mütəxəssislər dərmanın xəstəliyi tamamilə sağaltdığını söyləmək üçün hələ tez olduğunu bildirirlər. Sınaq iştirakçıları orta hesabla 18 ay müddətində izlənilib. Həkimlər vurğulayırlar ki, KT müayinəsində şişlərin görünməməsi xərçəngin orqanizmdən tam silindiyi anlamına gəlmir və dərmanın uzunmüddətli təsirini dəqiqləşdirmək üçün daha geniş tədqiqatlara ehtiyac var.