"Əli Həsənovun qızının Dubayda açdığı lüks bizneslə bağlı yaranan suallar, istər-istəməz cəmiyyətdə ciddi rezonans doğurur. Dubayın gurultulu, şou-biznesin və milyarderlərin məskəni olan Jumeirah bölgəsində – “First Avenue Mall”da açılan yeni, dəbdəbəli mağazadan danışırlar. 1500 kvadratmetrlik nəhəng sahəni tutan, dizaynı ilə göz qamaşdıran bu qızıl-zinət və bahalı aksessuar dükanının vitrinlərindəki brend çantaların, dünyanın ən bahalı saatlarının və brilyantların ümumi dəyəri 3 milyon dolları aşır."


NOCOMMENT.az xəbər verir ki, bunu jurnalist Sima Babayeva bildirib. Onun sözlərinə görə, illərlə dövlət kabinetlərində vətənpərvərlikdən dəm vuran keçmiş məmurun övladının Dubayın mərkəzində belə nəhəng imperiya qurması qəbuledilməzdir: "Özü Bakıda, kabinetlərdə oturub illərlə 'vətənpərvərlikdən', 'dövlətçilikdən' dəm vuran bir keçmiş məmurun övladı necə olur ki, Dubayın lap mərkəzində milyonluq imperiya qurur? Gənc bir qız bu qədər böyük sərmayəni, milyonluq malları hardan tapıb gətirib ora qoyub? Cavab o qədər sadə və acınacaqlıdır ki, onu tapmaq üçün heç uzağa getmək lazımdır. Bu dəyirmanın suyu illərdir Azərbaycan xalqının cibindən, dövlət büdcəsindən, məmur özbaşınalığından oğurlanan pullarla gəlir."

Jurnalist xatırladıb ki, keçmiş məmur hər zaman Ramiz Mehdiyevin komandasının əsas fiqurlarından biri olub və sədaqət maskası arxasında ölkənin sərvətlərini talayıb: "Jurnalistlərə, ziyalılara, cəmiyyətin həssas təbəqələrinə dövlət tərəfindən verilən evlərin necə bazar alverinə çevrildiyini unutmuşuqmu? Haqqı olan insanların evlərini başqalarına satıb pul alan, mətbuatın başına oyun açan, jurnalistlərin haqqını cibinə yığan məhz bu adam deyildi? Həmin o evlərin, satılan haqsız pul qazanclarının, dövlət büdcəsindən silinən milyonların hara getdiyi indi Dubayda, 1500 kvadratmetrlik mağazanın vitrinlərində özünü göstərir."

Sima Babayeva qeyd edib ki, bu cür açıq-aşkar talançılıqla məşğul olanların heç bir vicdan əzabı çəkmədiyini və topladıqları haram sərvətlə xaricdə kef məclisləri qurduqlarını vurğulayıb: "Onlar düşünürlər ki, illərlə yığdıqları var-dövləti sərhəddən keçirib istədikləri yerdə - Dubayda, Avropada keflə yaşaya bilərlər. Xalqın ac qarnı, səsi, etirazı onları maraqlandırmır. Amma unutmasınlar: tarix heç nəyi unutmur. Bu gün Dubayda açılan o 3 milyonluq mağaza sadəcə bir ticarət obyekti deyil; bu, illərlə Azərbaycan xalqına qarşı törədilmiş haqsızlığın, məmur özbaşınalığının və sərvət talanının canlı abidəsidir."

Əli,
NOCOMMENT.az