Azərbaycanda dərsliklərin məzmun və keyfiyyətində müşahidə olunan nöqsanlar, onların hazırlanması və nəşrinə dövlət büdcəsindən ayrılan vəsaitlərin səmərəli istifadəsi məsələsini yenidən gündəmə gətirib.
Dərsliklərin keyfiyyətinə nəzarətin gücləndirilməsi və xərclənən vəsaitlərlə bağlı şəffaf hesabatlılığın təmin olunması vacibdir.
Bu barədə Gununsesi.info-ya açıqlamasında Milli Məclisin deputatı Elnarə Akimova bildirib.
Deputat qeyd edib ki, son vaxtlar dərsliklərdəki ciddi məzmun qüsurları və texniki problemlər valideynlər, müəllimlər və mütəxəssislər arasında narahatlıq yaradır.
Aidiyyəti qurumlar, xüsusilə Elm və Təhsil Nazirliyi bu tənqidlərə adekvat reaksiya verməli, ictimaiyyətə əsaslandırılmış izahat təqdim etməlidir.
Onun sözlərinə görə, dərsliklərin hazırlanması və nəşrinə hər il milyonlarla manat vəsait ayrıldığı halda, ortaya çıxan nöqsanlar həmin vəsaitlərin nə dərəcədə səmərəli xərcləndiyi sualını yaradır.
Elnarə Akimova problemin həlli üçün üç təklif irəli sürüb.
O, Milli Məclisdə Elm və Təhsil Nazirliyinin və aidiyyəti qurumların iştirakı ilə mütəmadi ictimai dinləmələrin keçirilməsini, dərsliklərə ayrılan büdcə vəsaitlərinin xərclənməsi ilə bağlı parlamentə ətraflı və şəffaf hesabatların təqdim olunmasını təklif edib.
Deputat eyni zamanda dərsliklərin məzmun və keyfiyyətini qiymətləndirəcək ekspertiza komissiyasının yaradılmasını vacib sayıb.
Onun fikrincə, bu prosesdə tanınmış alimlərin, mütəxəssislərin və ictimaiyyət nümayəndələrinin iştirakı təmin edilməlidir.
Elnarə Akimova vurğulayıb ki, dərsliklər yalnız tədris vasitəsi deyil, həm də uşaqlarda milli kimliyin, tarixə və ana dilinə münasibətin formalaşmasında mühüm rol oynayır.
Buna görə də onların keyfiyyəti ümummilli məsələ kimi qiymətləndirilməlidir.
Orxan
The post Dərsliklərə ayrılan milyonlarla manatın xərclənməsi şəffaf olmalıdır first appeared on Günün Səsi.
