İsveçrəli alimlər qan damarlarının daxilində hərəkət edərək qan laxtalarının əridilməsinə kömək edən mikroskopik robotlar hazırlayıblar.

“Qafqazinfo” xəbər verir ki, bu barədə ETH Sürix Federal Texnologiya İnstitutu məlumat yayıb.

Qeyd olunub ki, yeni texnologiya maqnit sahəsi vasitəsilə idarə olunan, təxminən 8 mikrometr uzunluğunda mikrorobotlardan ibarətdir.

Ölçülərinə görə qırmızı qan hüceyrələri ilə müqayisə edilə bilən bu qurğular bioloji uyğun gel və maqnit xüsusiyyətli dəmir oksid nanohissəciklərindən hazırlanıb.

Mikrorobotlar xüsusi kateter vasitəsilə qan laxtasının yaxınlığına çatdırılır. Daha sonra bədəndən kənarda yaradılan maqnit sahəsi onların hərəkətini təmin edir. Fırlanaraq irəliləyən robotlar qan damarının divarı boyunca hərəkət edir və ətraflarında kiçik maye axınları yaradır. Bu axınlar laxtanı əridən dərmanların tıxanmış nahiyəyə daha effektiv çatdırılmasına kömək edir.

Alimlər texnologiyanı əvvəlcə qan damarlarını təqlid edən silikon modeldə sınaqdan keçiriblər. Donuz qanından hazırlanmış laxtalar üzərində aparılan təcrübələrdə mikrorobotların köməyi ilə dərmanların laxtanı altı dəfə daha sürətlə əridə bildiyi müəyyən olunub.

Sonrakı mərhələdə Berlinin “Charité” Universitet Xəstəxanasının alimləri ilə birlikdə canlı donuzlar üzərində sınaqlar keçirilib.

Təcrübələr zamanı heyvanların arteriyalarında süni şəkildə qan laxtaları yaradılıb. Mikrorobotların dərmanlarla birlikdə istifadəsindən 30 dəqiqə sonra qan dövranı bərpa olunan damar sahəsinin yalnız dərman tətbiq edilən qrupla müqayisədə iki dəfə böyük olduğu müşahidə edilib.

Tədqiqatçılar hesab edirlər ki, bu texnologiya gələcəkdə insult, infarkt və ağciyər emboliyası kimi təhlükəli vəziyyətlərin müalicəsində yeni imkanlar yarada bilər.

Bununla belə, mikrorobotlar hələ insanlar üzərində sınaqdan keçirilməyib.