Quru sərhədlərin bağlı olduğu Azərbaycanda bahalı aviabiletlər və AZAL-ın bazardakı mövqeyi yenidən müzakirə mövzusuna çevrilir.

NOCOMMENT.az Gununesi.info-ya istinadən bildirir ki, Azərbaycan Hava Yollarının (AZAL) Bakı–İstanbul marşrutu üzrə uçuşlarla bağlı yeni qərarı sərnişinlərin narazılığına səbəb ola biləcək növbəti addım kimi qiymətləndirilir.

Aviaşirkətin iddiasına görə, 2027-ci il yanvarın 4-dən etibarən Bakı–İstanbul marşrutu üzrə bütün reyslərin İstanbul Beynəlxalq Hava Limanı (IST) vasitəsilə həyata keçirilməsi planlaşdırılır. AZAL bu qərarı uçuş proqramının optimallaşdırılması və sərnişinlərə beynəlxalq bağlantı imkanlarının genişləndirilməsi ilə əsaslandırır.

Lakin Azərbaycanda aviasiya bazarının mövcud vəziyyəti, xüsusilə aviabiletlərin qiyməti fonunda bu qərar başqa sualları da gündəmə gətirir.

İllərdir Azərbaycan vətəndaşları qonşu Gürcüstan və Ermənistanla müqayisədə aviabiletlərin baha olmasından şikayətlənirlər. Region ölkələri ilə müqayisədə Azərbaycandan bir çox beynəlxalq istiqamətlərə uçuşların qiymətinin əhəmiyyətli dərəcədə yüksək olması aviasiya bazarında rəqabət olmaması ən ciddi narazılıq doğurur.

Əsas problem isə ondan ibarətdir ki, Azərbaycanda quru sərhədlər hələ də bağlıdır. Vətəndaşların qonşu ölkələrə quru yolla sərbəst səfər etmək imkanının məhdud olduğu bir şəraitdə hava nəqliyyatı alternativ deyil, bir çox hallarda yeganə real seçimə çevrilib.

Belə bir vəziyyətdə aviabiletlərin əlçatanlığının təmin edilməsi dövlətin və aviasiya sektorunun qarşısında duran mühüm məsələlərdən biri olmalıdır. Əksinə, ucuz tarifli biletlərin və sərnişinlər üçün daha münasib uçuş seçimlərinin məhdudlaşdırılması aztəminatlı vətəndaşların səfər imkanlarını daha da çətinləşdirə bilər.

Ona görə də aviaşirkət qiymət siyasətinin hansı iqtisadi meyarlar əsasında formalaşdığını, daha münasib tariflərin niyə geniş əlçatan olmadığını ictimaiyyətə izah etməlidir.

Qonşu Gürcüstan və Ermənistanın aviasiya bazarları ilə müqayisədə Azərbaycanda aviabiletlərin qiymət fərqinin səbəbləri də müstəqil araşdırılmalı, rəqabət mühitinin yaradılması üçün konkret addımlar atılmalıdır.

Quru sərhədlərin bağlı qaldığı bir ölkədə hava nəqliyyatı lüks xidmətə çevrilməməlidir. Vətəndaşın ölkədən çıxmaq, ailəsinə qovuşmaq, müalicə almaq və ya xaricdə təhsilini davam etdirmək imkanları onun maddi vəziyyətindən asılı olmamalıdır.

AZAL kommersiya maraqlarını əsas gətirə bilər. Ancaq dövlətin milli aviadaşıyıcısı kimi onun sosial məsuliyyəti də var. Xüsusilə alternativ nəqliyyat imkanlarının məhdudlaşdırıldığı indiki şəraitdə bu məsuliyyət daha da artır.

İctimaiyyətin haqlı sualı isə budur ki, Azərbaycan vətəndaşı niyə qonşu ölkələrin vətəndaşlarından dəfələrlə baha aviabilet almağa məcbur olmalıdır?