ABŞ prezidentinin xüsusi nümayəndəsi Stiv Uitkoff və Donald Trampın kürəkəni Cared Kuşner Rusiya ilə Ukrayna arasında əsirlərin mübadiləsinin hazırlanması istiqamətində çalışırlar.
APA xəbər verir ki, bu barədə Ağ Evin mətbuat xidməti məlumat yayıb.
Ağ Evin mətbuat katibinin müavini Anna Kellinin sözlərinə görə, Əbu-Dabidə keçirilən üçtərəfli danışıqlardan sonra tərəflər Avropa tərəfdaşlarının gələcək məsləhətləşmələrə cəlb olunmasını təmin edib və müharibə başlayandan bəri ən böyük əsir mübadiləsinin hazırlanmasına başlayıblar.
Qeyd edək ki, Rusiya, ABŞ və Ukrayna nümayəndə heyətləri noyabrın 10-11-də Əbu-Dabidə danışıqlar aparıblar. Rusiya prezidenti Vladimir Putinlə görüşən Uitkoff və Kuşnerin səfərindən sonra Rusiya və Ukrayna arasında genişmiqyaslı əsir mübadiləsi barədə razılıq əldə olunduğu açıqlanıb.
