ABŞ Konqresinin Nümayəndələr Palatasına müdafiə naziri Pit Heqsetin impiçment prosedurunun başlanmasını nəzərdə tutan qətnamə təqdim edilib.
APA xəbər verir ki, təşəbbüslə Kentukki ştatından respublikaçı konqresmen Tomas Massi çıxış edib.
Konqresmen Nümayəndələr Palatasındakı çıxışı zamanı qətnamənin əsas müddəalarını səsləndirib.
Sənəddə Heqsetin İrana qarşı müharibənin başlanması ilə bağlı qanunsuz əmrləri bilərəkdən yerinə yetirdiyi və buna görə vəzifəsindən uzaqlaşdırılmalı olduğu iddia edilir.
Massi bildirib ki, hərbi əməliyyatlar Konqresin razılığı olmadan başlanıb və həmin vaxt İran ABŞ üçün birbaşa təhlükə yaratmayıb.
Qətnamədə Pentaqon rəhbərinə qarşı ümumilikdə səkkiz ittiham irəli sürülüb. Bunlar arasında İrana qarşı müharibə ilə yanaşı, Yəmən və Venesueladakı hərbi əməliyyatlarla bağlı səlahiyyətlərdən sui-istifadə iddiaları da yer alıb.
Məlumata görə, qətnamə ilə bağlı səsvermənin yaxın günlərdə keçirilməsi gözlənilir.
Qeyd edək ki, bir çox demokrat konqresmen, eləcə də bəzi respublikaçılar ABŞ-ın İranla müharibəsində Heqsetin fəaliyyətini kəskin tənqid ediblər.
Pentaqon rəhbəri isə impiçment təşəbbüsündən narahat olmadığını bildirib.
