ABŞ-ın Federal Mülki Aviasiya İdarəsi (FAA) ölkə ərazisindəki bütün hava limanlarından uçuşlara icazə verib.
APA xəbər verir ki, bu barədə idarənin bildirişində deyilir.
"Bütün ölkə üzrə təyyarələrin uçuşuna qoyulan qadağa ləğv edilib", - sənəddə qeyd olunub.
Məhdudiyyətlər dörd saatdan çox qüvvədə qalıb, bu müddət ərzində 5 117 reys ləğv edilib, 9 814 reys gecikdirilib. Qadağa 1,5 milyona yaxın aviasərnişinə toxunub.
***
04:15
ABŞ-da aviasiya sistemində yaranan texniki nasazlıq səbəbindən ölkənin bütün hava limanlarından uçuşların müvəqqəti dayandırıldığı bildirilir.
CNN telekanalının ABŞ Federal Aviasiya Administrasiyasına (FAA) istinadən məlumatına görə, buna Çikaqonun Miduey hava limanında şəbəkə marşrutlaşdırıcısında yaranan nasazlıq səbəb olub.
Bildirilib ki, milli hava məkanının idarəetmə sistemində rabitə tezlikləri ilə bağlı problemlər yaranıb. Aviasiya qurumları təhlükəsizlik məqsədilə uçuşların dayandırılması barədə qərar qəbul ediblər.
Məlumata əsasən, texniki nasazlıq nəticəsində ölkə üzrə 10 mindən çox aviareys gecikib.
Qeyd olunur ki, sistemin fəaliyyəti yaxın vaxtlarda bərpa edilməzsə, bəzi ABŞ aviaşirkətləri cümə günü uçuşları tamamilə dayandıra bilər.
