Gədəbəydə 17 yaşlı qızı evlənmək niyyəti ilə qaçıran nişanlısı, onun qardaşı və anası cinayət məsuliyyətinə cəlb edilib.
“Qafqazinfo”nun məlumatına görə, Gəncə Ağır Cinayətlər Məhkəməsində bu iş üzrə hökm elan edilib.
32 yaşlı Emin qaçırdığı qızla bir müddət əvvəl nişanlanıb. Həmin vaxt oğlan xaricdə olsa da, nişanlısı ilə telefonla danışıb. Dediyinə görə, qızın yetkinlik yaşına çatmadığından xəbəri olmayıb. Emin qardaşı Naib vasitəsilə Ayşənlə (şərti) tanış olub. Naib də elə Eminin nişanlısının bacısı ilə evlənmək üzrə olub.
Lakin sonradan iki qardaş və ana birləşib Ayşəni qaçırmaq qərarına gəliblər. Onlar qızı yolun kənarında zorla maşına oturdub Gədəbəydən Tovuza aparıblar.
Amma Ayşən oğlanın bu hərəkəti ilə razılaşmayıb, onu buraxmasını tələb edib. Qızın anasının polisə şikayətindən sonra o, evə qaytarılıb. Bu məsələdən sonra Ayşənin bacısı ilə digər qardaşın da münasibəti pozulub.
Polis əməkdaşları tərəfindən qardaşların ikisi də saxlanılıb. Onlara qarşı Cinayət Məcəlləsinin 144.3-cü (adam oğurluğu) maddəsi ilə ittiham verilib. Eyni maddə ilə ittiham olunan ana barəsində isə həbslə bağlı olmayan qətimkan tədbiri seçilib.
Ana və oğlanları məhkəmədə özlərini təqsirli biliblər. Emin ifadəsində nişanlısının 18 yaşı olduğunu polisdə öyrəndiyini, ondan niyə şikayət etdiyini isə hələ də bilmədiyini deyib.
Məhkəmə yekunda müttəhimləri adam oğurluğunda təqsirli bilib. Amma hakim hadisənin ilkin motivinin adam oğurluğu deyil, ailə qurma niyyəti ilə bağlı olmasını, zərərçəkmiş şəxslə barışıq əldə edilməsini yumşaldıcı hal hesab edib.
Hökmə əsasən, Cinayət Məcəlləsinin 62-ci (sanksiya həddinin ən aşağı həddindən də az cəza təyin etmə) maddəsi tətbiq edilməklə, Eminə 2, qardaşına 1 il 6 ay həbs cəzası verilib. Anaya isə sınaq müddəti seçilməklə 10 il şərti cəza təyin edilib.
Sail Ağasəlim
